ސަލްމާން ޚާންގެ އާ ފިލްމު "ސިކަންދަރު" ގެ ޝޫޓިން އަންނަ މަހުގެ 20 ގައި ފަށަން ނިންމާފައިވާ ކަމަށް ރިޕޯޓްތައް ބުނެފި އެވެ.
ފިލްމީ ޚަބަރުތައް ގެނެސްދޭ މީޑިއާތަކުން ބުނީ ފިލްމުގެ ޝޫޓިން ފެށުމުގެ އެންމެ ފަހުގެ ތައްޔާރީތައް މިހާރު ކުރިއަށްދާ ކަމަށެވެ. އެގޮތުން އަންނަ މަހުގެ 20 ގައި މުމްބާއީގައި ޝޫޓިން ފަށާ އިރު، އެންމެ ފުރަތަމަ ޝޫޓްކުރަން ހަމަޖެހިފައި ވަނީ މި އެކްޝަން ތުރިލާގެ ވަރުގަދަ އެކްޝަން މަންޒަރުތަކެކެވެ.
ސަލްމާން "ސިކަންދަރު" ކިޔާ ކެރެކްޓާއެއް ކުޅޭ މި ފިލްމަކި އޭނަގެ ގާތް އެކުވެރިޔާ ސާޖިދު ނަދިއަދުވާލާ ޕްރޮޑިއުސްކޮށް، އޭއާރް މުރްގަދޯސް ޑައިރެކްޓްކުރާ ފިލްމެކެވެ. އާންމުކޮށް ތަމަޅަ ފިލްމު ހަދާ "މުރްގަދޯސް" އަކީ އާމިރުގެ ޚާންގެ ވަރަށް ކާމިޔާބު ފިލްމެއް ކަމަށްވާ 2008 ގެ "ގަޖިނީ" ގެނެސްދިން ޑައިރެކްޓަރެކެވެ.
ސަލްމާން ހިމަނައިގެން ފިލްމެއް ހަދަން މުރްގަދޯސް ނިންމި އިރު، އޭނަ މިހާރު އަންނަނީ ތަމަޅަ އެކްޝަން ތުރިލާއެއްގެ މަސައްކަތް ކުރަމުންނެވެ. އޭގެ ވާކިން ޓައިޓްލްއަކަށް ކިޔަނީ "އެސްކޭ23" އެވެ. މުރުގަދޯސް އެންމެ ފަހުން ޑައިރެކްޓްކޮށް ގެނެސްދިން ފިލްމަކީ ރަޖްނީކާންތުގެ 2020 ގެ "ދަރުބާރު" އެވެ.
އަންނަ އަހަރުގެ ފިތުރު އީދުގައި ރިލީޒްކުރަން ހަމަޖެހިފައިވާ "ސިކަންދަރު" ގެ ބަތަލާ އަކީ މިދިޔަ އަހަރު ރިލީޒްކުރި ރަންބީރް ކަޕޫރްގެ "އެނިމަލް" ގެ ޒުވާން ބަތަލާ ރަޝްމިކާ މަންދަނާ އެވެ. ސަލްމާންގެ އެންމެ ފަހުގެ ފިލްމަކީ މިދިޔަ އަހަރުގެ "ޓައިގާ 3" އެވެ.