ރާއްޖޭގެ ދަރަނި މެނޭޖުކޮށް، ހަރުދަނާކުރުމަށްޓަކައި އެކަމަށް ހާއްސަ ގާނޫނެއް ހަދައި ދަރަނި މެނޭޖުކުރާނެ ހާއްސަ އޮފީހެއް އުފައްދަން ނިންމާފައިވާ ކަމަށް ފިނޭންސް މިނިސްޓްރީން ބުނެފި އެވެ.
ވޯލްޑް ބޭންކުން ރާއްޖެއާ ގުޅޭ ގޮތުން ތައްޔާރުކުރި "ސްކޭލިން ބެކް އެންޑް ރިބިލްޑިން ބަފާސް" ރިޕޯޓާ ބެހޭ ގޮތުން މަޝްވަރާ ކުރުމަށް ހޯމަ ދުވަހު ބޭއްވި ޕެނަލް ޑިސްކަޝަންގައި ފިނޭންސް މިނިސްޓްރީގެ ޑެޕިއުޓީ މިނިސްޓަރު އަހުމަދު ސާއިދު މުސްތަފާ ވިދާޅުވީ ގާނޫނަށް ގެންނަ ބަދަލުތަކުގެ ތެރެއިން ޕަބްލިކް ޑެޓް މެނޭޖްމަންޓު ބިލެއް އެކުލަވާލައި އެ ފާސްވުމުން ދަރަނި މެނޭޖު ކުރަން ހާއްސަ އޮފީހެއް ގާއިމުކުރާނެ ކަމަށެވެ.
"އެ ބިލުގައި ވަރަށް ސާފުކޮށް ބަޔާންކުރާނަން ޑެޓް ސަސްޓެއިނިބިލިޓީ ދަމަހައްޓަން އަމަލުކުރަން ޖެހޭ ގަވާއިދުތައް ވެސް،" އޭނަ ވިދާޅުވި އެވެ. "އަދި ދަރަނީގެ ކަންކަމުގައި ދެ ފުއްފެންނަ ގޮތަށް ކޮންމެ ސަރުކާރަކަށް ވެސް އަމަލު ކުރަން ޖެހޭނެ ގޮތަށް އެ ގާނޫނު ހުށަހެޅިގެން ދާނީ."
ސާއިދު އިތުރަށް ވިދާޅުވީ ދަރަނި ދައްކަން އުފައްދާފައިވާ ސޮވަރިން ފަންޑަށް ވެސް ހާއްސަ ގާނޫނެއް ހަދައި އެއީ ގާނޫނީ ގޮތުން ރައްކާތެރިކަން ލިބޭ ފަންޑަކަށް ވެސް ހަދަން ނިންމާފައިވާ ކަމަށެވެ. އަދި ސޮވަރިން ފަންޑު ބެލެހެއްޓުމާއި އެ ފަންޑުން އިންވެސްޓް ކުރުމުގެ އުސޫލުތައް ވެސް ގާނޫނުގެ ތެރެއިން ކަނޑައަޅާނޭ ކަމަށް އޭނާ ވިދާޅުވި އެވެ.
"އެ ގާނޫނުގެ ތެރެއިން އިންވެސްޓްމަންޓަށް ހާއްސަ ކޮމެޓީއެއް ވެސް އެކުލަވައިލާނެ." އޭނަ ވިދާޅުވި އެވެ.