އޮގަސްޓް މަހު ރިލީޒްކުރަން ހަމަޖެހިފައިވާ ތެލެގޫ އެކްޓަރު އައްލޫ އަރުޖުންގެ "ޕުޝްޕާ 2: ދަ ރޫލް" ގެ އައިޓަމް ލަވަ ބޮލީވުޑްގެ ބަތަލާ ޓްރިޕްތީ ދިމްރީ ހިމަނައިގެން ގެނެސްދޭން ނިންމާފައިވާ ކަމަށް ރިޕޯޓްތައް ބުނެފި އެވެ.
ފިލްމީ ޚަބަރުތައް ގެނެސްދޭ މީޑިއާތަކުން ބުނީ އެ ލަވައިގެ ޝޫޓިން އަންނަ މަހުގެ ތެރޭގައި ފަށާނެ ކަމަށާއި އެކަމަށް ހާއްސަކޮށްގެން މިހާރި ސެޓެއް ވެސް ހެދުމުގެ މަސައްކަތް ވެސް ކުރަމުން އަންނަ ކަމަށެވެ. މި އައިޓަމް ލަވައިގައި ޓްރިޕްތީއާ އެކީ އައްލޫ ވެސް ފެންނާނެ އެވެ.
ދެހާސް އެކާވީހުގައި ރިލީޒްކުރި "ޕުޝްޕާ" ގައި ހިމެނުނު ބަތަލާ ސަމަންތޫ ރޫތު ޕްރަބޫގެ އައިޓަމް ލަވަ "އޫ އަންޓަވާ" އަކީ ވެސް އާންމުންގެ ތެރޭގައި ވަރަށް ބޮޑު މަގުބޫލު ކަމެއް ހޯދި ލަވައެކެވެ.
އިންޑިއާގެ މިި އަހަރުގެ އެންމެ އުންމީދީ ފިލްމުތަކުގެ ތެރޭގައި "ޕުޝްޕާ 2" ގެ އައިޓަމް ލަވައިން ޓްރިޕްތީ އަށް ފުރުސަތު ލިބުނު އިރު، މިދިޔަ އަހަރު ރިލީޒްކުރި ރަންބީރްގެ ކަޕޫރްގެ "އަނިމަލް" ގައި ކުރިއަމުން އަންނަ އުންމީދީ ޒުވާން ބަތަލާ ކުޅުނު ރޯލުގެ ސަބަބުން ބޮޑު މަޝްހޫރު ލިބި، ޑިމާންޑް ވަރަށް ބޮޑަށް އުފުލިފައިވެ އެވެ.
ޓްރިޕްތީގެ ކުރިއަށް ހުރި ފިލްމުތަކުގެ ތެރޭގައި "ބޭޑް ނިއުސް"، "ބޫލް ބުލައްޔާ 3" އަދި "ވިކީ ވިދިއާ ކާ ވޯ ވާލާ ވީޑިއޯ" ހިމެނެ އެވެ. މި ތިން ފިލްމު ވެސް މި އަހަރު ރިލީޒްކުރާނެ އެވެ.
ސުކްމާރު ޑައިރެޓްކޮށް، ރަޝްމިކާ މަންދަނާގެ ބަތަލާގެ ރޯލުން ފެންނާނެ "ޕުޝްޕާ 2" ރިލީޒްކުރަން ހަމަޖެހިފައި ވަނީ އޮގަސްޓް 15 ގަ އެވެ.