އެކީގައި ކުޅުނު ފުރަތަމަ ފިލްމަށް 27 އަހަރު ފަހުން ކާޖޮލް އާއި ޕްރަބޫދޭވާ އެކީގައި އާ ފިލްމެއްގެ މަސައްކަތް މިހާރު ކުރަމުން އަންނަ ކަމަށް ރިޕޯޓްތައް ބުނެފި އެވެ.
ފިލްމީ ޚަބަރުތައް ގެނެސްދޭ މީޑިއާތަކުން ބުނީ މި އެކްޝަން ފިލްމުގެ ޑައިރެކްޓަރަކީ ނެޝަނަލް އެވޯޑް ހޯދާފައިވާ ތެލެގޫ ޑައިރެކްޓަރު ޗަރަން ކަމަށެވެ. އޭނަ އަކީ "އޮޓޯގްރާފް" އާއި "ވެޓްރީ ކޮޑީ ކައްޓޫ" ފަދަ ފިލްމުތައް ގެނެސްދިން ޑައިރެކްޓަރެވެ. ޗަރަންގެ އާ ފިލްމާ ބެހޭ އިތުރު ތަފުސީލެއް އަދި ނުލިބެ އެވެ. އެގޮތުން މީގެ ނަން ވެސް އަދި ސާފެއް ނުވެ އެވެ.
ކާޖޮލް އާއި ޕްރަބޫދޭވާ އެކީގައި ކުޅުނު ފުރަތަމަ ފިލްމަކީ ޑައިރެކްޓަރު ރަޖީވް މެނަން 1997 ގައި ގެނެސްދިން ކާމިޔާބު ތަމަޅަ ފިލްމު "މިންސާރާ ކަނަވޫ" އެވެ. ހިންދީ ބަހުން "ސަޕްޕޭ" ގެ ނަމުން ގެނެސްދިން ފިލްމުގެ ރޯލެއް މަޝްހޫރު އެކްޓަރު އަރްވިންދު ސުވާމީ ވެސް ކުޅުނެވެ.
މޮޅު ނެށުންތެރިއެއްގެ ގޮތުގައި މަޝްހޫރުކަން ހޯދި ޕްރަބޫދޭވާއާ އެކީ ކާޖޮލް އަލުން ފިލްމެއްގެ މަސައްކަތްކުރާ އިރު، އޭނަގެ ފިރިމީހާ އަޖޭ ދޭގްވަން ވަނީ ޕްރަބޫދޭވާ ޑައިރެކްޓްކުރި ފިލްމެއް ވެސް ކުޅެފަ އެވެ. އެއީ 2014 ގެ "އެކްޝަން ޖެކްސަން" އެވެ.
މިހާތަނަށް ކާމިޔާބު އެތައް ފިލްމެއް ކުޅެފައިވާ ކާޖޮލްގެ އެންމެ ފަހުގެ ފިލްމަކީ މިދިޔަ އަހަރު ނެޓްފްލިކްސް އިން ގެނެސްދިން އެންތޮލޮޖީ ފިލްމު "ލަސްޓް ސްޓޯރީސް 2" އެވެ. އޭނަ ދެން އެންމެ އަވަހަށް ފެންނާނީ އެ ޕްލެޓްފޯމުން ގެނެސްދޭން ހަމަޖެހިފައިވާ "ދޯ ޕައްތީ" އިންނެވެ.