އިންޑިއާގެ ވެރިކަން ކުރާ ޕާޓީ، ބީޖޭޕީގެ ޓިކެޓްގައި ލޯކް ސަބާ އަށް ވާދަކުރާ ފިލްމީ ތަރި ކަންގަނާ ރަނާވަތުގެ ކެމްޕޭންގައި ބޮޑުވަޒީރު ނަރެންދުރާ މޯދީ މިއަދު ބައިވެރިވެޑައިގެންފި އެެވެ.
ކަންގަނާ ވާދަކުރަނީ އޭނަގެ އުފަން ސްޓޭޓް ކަމަށްވާ ހިމާޗަލް ޕްރަދޭޝްގެ މަންޑީ ދާއިރާގެ ގޮނޑިއަށެވެ. އެ ދާއިރާ އަށް މިއަދު މޯދީ ވަޑައިގަތުމުން ކަންގަނާ އާއި ކެމްޕޭން ޓީމުން ހޫނު މަރަހަބާއެއް ކިޔާފައިވެ އެވެ. އަދި މެންދުރު ފަހުން ކުރިއަށް ގެންދިޔަ ކެމްޕޭން އެއްވުމުގައި މޯދީ ވާހަކަ ދައްކަވައި، ވީހާ ވެސް ގިނަ ބަޔަކު ކަންގަނާ އަށް ވޯޓް ދެއްވުމަށް އެދިވަޑައިގަތެވެ.
މޯދީ ވިދާޅުވީ ގޮތުގައި ކަންގަނާ އަކީ ވަރަށް ވަތަނީ މީހެކެވެ. އަދި ލޯކް ސަބާ އަށް އޭނަ އިންތިހާބުވެއްޖެ ނަމަ އެއީ މަންޑީ ދާއިރާގެ ރައްޔިތުންގެ ހައްގުގައި ވަރަށް ފުރިހަމަ އަށް ވަކާލާތުކޮށް ގިނަ މަސައްކަތްތަކެއް ކުރާނެ މީހަކަށްވާނެކަމުގެ ޔަގީންކަން އޮތް ކަމަށް ވިދާޅުވި އެވެ.
ލޯކް ސަބާ އިންތިހާބުގައި ކަންގަނާ ވާދަކުރަން ނިންމީ ބީޖޭޕީން ދިން ދައުވަތަކާ ގުޅިގެންނެވެ. އޭނަ އަކީ އެ ޕާޓީ އާއި މޯދީގެ މަރުދޭ ސަޕޯޓަރެކެވެ.
ކަންގަނާ ބުނެފައިވާ ގޮތުގައި އޭނަ އަށް ގޮނޑި ކާމިޔާބު ކުރެވޭނެކަމުގެ އުންމީދު ވަރަށް ބޮޑެވެ. އަދި ގޮނޑި ލިބިއްޖެ ނަމަ ފިލްމީ މަސައްކަތްތަކާ ދުރުވެ، ސިޔާސީ މަސައްކަތްތަކަށް އެއްކޮށް ހުސްވާނެ އެވެ.
އިންޑިއާގެ ގާނޫނު ހަދާ މަޖިލީހުހެ ތިރިގެ، ލޯކް ސަބާ އަށް ކަންގަނާ ވާދަކުރަން ނިންމައި ކެމްޕޭންގައި ވަރަށް ބިޒީކޮށް އުޅެން ޖެހުމާ ގުޅިގެން އަންނަ މަހުގެ 14 ފައި ރިލީޒްކުރަން ތާވަލުކޮށްފައި އޮތް އޭނަގެ ފިލްމު "އިމަޖެންސީ" ވެސް ރިލީޒްކުރުން ވަނީ މުއްދަތެއް ނެތް ގޮތަށް ފަސްކޮށްފަ އެވެ.
މިދިޔަ މަހުގެ 19 ގައިު ފެށި އިންތިހާބުގެ ވޯޓްލުން އަންނަ މަހުގެ 1 ހަމައަށް ކުރިއަށް ދާނެ އެވެ.