ށަވިޔަނި އަކުރުން ފެށޭ ބަސްތަކެއް އުފައްދަވާނެ ކަމަށް ބަހާ ބެހޭ މިނިސްޓަރު އާދަމް ނަސީރު ވިދާޅުވި ކަމަށް ބުނެ ފެތުރި ވާހަކަތައް މިނިސްޓަރު ދޮގު ކުރައްވައިފި އެވެ.
ރަޖިސްޓްރީ ނުކޮށް ހިންގާ ނޫހަކުން މިނިސްޓަރު ވިދާޅުވި ކަމަށް ބުނެ ރިޕޯޓްކޮށްފައިވާ ގޮތުގައި ރައީސް ޑރ. މުހައްމަދު މުއިއްޒުގެ ވެރިކަމުގައި ށ އަކުރުން ފެށޭ ފަސް ބަހެއް އުފެއްދުމަކީ އަމާޒެކެވެ. މިކަމާ ގުޅިގެން މިނިސްޓަރަށް ފާޑުކިޔުންތަކެއް ވެސް އަމާޒުވެފައި ވަނިކޮށް، ވިދާޅުވީ އެ ވާހަކަ އަކީ ދޮގު ވާހަކައެއް ކަމަށެވެ. އަދި އެފަދަ ވާހަކައެއް ވިދާޅު ނުވާ ކަމަށް އާންމުންގެ މީހަކު ކުރި ސުވާލެއްގެ ޖަވާބުގައި މިނިސްޓަރު ނަސީރު ވިދާޅުވި އެެވެ.
މިނިސްޓަރު ވިދާޅުވީ ށަވިޔަނި އަކުރުން ފެށޭ ނަންތަކެއް އުފެއްދުމަކީ އެއްވެސް މާނައެއް ހުރި ކަަމެއް ނޫން ކަމަށާއި ސަބަބަކީ ށަވިޔަނީގެ އަޑަކީ ލަފުޒެއްގެ ފެށުމަށް ދުލުން އުފައްދަން ދަތި އަޑަކަށްވާތީ އެވެ.
"އެއީ ގުދުރަތީ ކަމެއްް. ވީމާ ށަވިޔަނިން ލަފުޒެއް އުފެއްދުމަކީ އެއްވެސް ގޮތަކަށް އަޅުގަނޑަށް ގަބޫލު ކުރެވޭ އަދި ތަރުހީބު ދެވޭ ކަމެއް ނޫން." ދިވެހި އަދީބެއްގެ ގޮތުގައި މަޝްހޫރު މިނިސްޓަރު ވިދާޅުވި އެވެ.