ރާއްޖޭގެ އެންމެ ދެކުނުން ފުޅާކޮށް ދަނޑުވެރިކަން ކުރަމުން އަންނަ ފުވައްމުލަކުން ދަނޑުވެރިކަމަށް ހާއްސަކޮށްގެން ބިންތަކެއް ދޫކުރަން ނިންމައިފި އެވެ.
މިކަމާ ގުޅޭ ގޮތުން ކައުންސިލުން ނެރެފައިވާ އިއުލާނެއްގައި ބުނީ އެ ސިޓީގައި ދަނޑުވެރިކަން ކުރަމުން އަންނަ ފަރާތްތަކަށް ހަމަހަމަކޮށް ބިން ދޫކުރުމާއި ދަނޑުވެރިކަމުގެ ދާއިރާ އިތުރަށް ފުޅާކޮށް ހަރުދަނާ ކުރުމަށްޓަކައި ދަނޑުވެރިކަމަށް ބިން ދޫކުރުމާއި ދަނޑުވެރިކަން ކުރުމުގެ އުސޫލު ވެސް ފާސްކޮށް މިހާރު އާންމުކޮށްފައިވާ ކަމަށެވެ.
އެހެންވެ އެ އުުސޫލުގެ ދަށުން ބިންތަކެއް ދޫކުރަން ހުޅުވާލައި ޝައުގުވެރިވާ ފަރާތްރަކަށް ކުރިމަތިލުމުގެ އަންނަ މަހުގެ 13 އާ ހަމައަށް ވަނީ ހުޅުވާލައިފަ އެވެ. މިކަމާ ބެހޭ އިތުރު މައުލޫމާތު ކައުންސިލްގެ 6862828 ނަންބަރަށް ގުޅައިގެން ހޯދޭނެ އެވެ.
ދަނޑުވެރި ކަމަށް ފުވައްމުލަކުން ބިން ދޫކުރާ އިރު އެންމެ ބޮޑު ސައިޒަކަށް ދޫކުރާނީ 10،000 އަކަފޫޓްގެ ބިމެވެ.
ފުވައްމުލަކުގައި އާންމުކޮށް ހައްދާ ބާވަތްތަކުގެ ތެރޭގައި ކަރާ، ފަޅޯ، ބަށި، މިރުސް އަދި ކިއުކަމްބާ ހިމެނެ އެވެ.