މިދިޔަ ބުރާސްފަތި ދުވަހު ރ. އުނގޫފާރުގައި މަގުބައްތި ހޮޅިދަނޑިއަކުން ކަރަންޓުގައި ޖެހުނު ތިން ކުދިންގެ ތެރެއިން އެކަކަށް އަދިވެސް ފަރުވާ ދެމުން އަންނަނީ ވެންޓިލޭޓަރުގައި ކަމަށް ކައުންސިލުން ބުނެފި އެވެ.
ހާލު ސީރިއަސް 18 އަހަރުގެ ޒުވާނާ އަކީ ކަރަންޓްގައި ޖެހުނު އަނެއް ދެ ކުދިން ސަލާމަތްކުރި ކުއްޖާ އެވެ. ކަރަންޓްގައި ޖެހުނު އަނެއް ދެ ކުދިންނަކީ 12 އަހަރުގެ އަންހެން ކުއްޖަކާއި 8 އަހަރުގެ ފިރިހެން ކުއްޖެކެވެ. އެ ދެ ކުދިންނަށް އުނގޫފާރު ހޮސްޕިޓަލްގައި ފަރުވާ ދިނުމަށް ފަހު ވަނީ ދޫކޮށްލައިފަ އެވެ.
ނަމަވެސް ކަރަންޓުގައި ޖެހުނު 18 އަހަރުގެ ފިރިހެން ކުއްޖާ އަށް އަދިވެސް ވެންޓިލޭޓަރުގައި ފަރުވާ ދެމުން އަންނަ އިރު، އެއީ އޯޓިސްޓިކް ޒުވާނެކެވެ.
ކުދިން ކަރަންޓްގައި ޖެހުނީ އުނގޫފާރު ޕާކް ކައިރީއި މަގުގައި ހެދިފައި ފެންގަނޑެއްގެ ތެރޭގައި ކުޅެން އުޅުމުގެ ތެރޭގަ އެވެ.