މެކްޑޮނަލްޑްސްގެ ފާސްޓްފުޑް ކައިގެން މަހެއްގެ ތެރޭގައި އަމިއްލަ ހަށިގަނޑަށް އައި ބަދަލު ދައްކުވައިދިން ޑޮކިއުމަންޓްރީ ފީޗާ "ސުޕަ ސައިޒް މީ" ހަދައިގެން އޮސްކާ އެވޯޑް ވެސް ހާސިލުކުރި އެމެރިކާގެ މަޝްހޫރު ޑޮކިއުމަންޓަރީ ފިލްމު ޑައިރެކްޓަރު މޯގަން ސްޕާލޮކް މަރުވެއްޖެ އެވެ.
އުމުރުން 53 އަހަރުގައި އޭނަ މަރުވީ ކެންސަރު ބަލީގަ އެވެ. އާއިލާ އިން ނެރުނު ބަޔާނެއްގައި ބުނީ މޯގަން މަރުވީ ބުރާސްފަތި ދުވަހު ކަމަށާއި މިއީ އާއިލާ އަށް ވަރށް ހިތްދަތި ދަނޑިވަޅެއް ކަމަށެވެ. ގިނަ އަދަދެއްގެ ޑޮކިއުމަންޓަރީ ގެނެސްދީފައިވާ ޑައިރެކްޓަރުގެ "ސުޕަ ސައިޒް މީ" އަކީ 2004 ގައި ގެނެސްދިން ވަރަށް މަގުބޫލުވި އަދި ބައެއް މީހުންގެ ފަރާތުން ބޮޑެތި ފާޑުކިޔުންތަކެއް ވެސް އަމާޒުވި އެއްޗަކަށެވެ.
މޯގަން އެންމެ ފަހުން ގެނެސްދިން ޑޮކިއުމަންޓަރީ އަކީ 2017 ގެ "ސުޕަ ސައިޒް މީ 2: ހޮލީ ޗިކެން!" އެވެ. އޭނަ ގެނެސްދިން މަޝްހޫރު ޓީވީ ރިލިއަޓީ ޝޯތަކުގެ ތެރޭގައި 2005 ގެ "30 ޑޭސް" ހިމެނެ އެވެ.
މޯގަން ތިން ކައިވެންޏެއްކޮށް ކޮށްފައިވާ އިރު، ދެ ދަރިން ލިބިފައިވެ އެވެ.