މިދިޔަ އަންގާރަ ދުވަހު ސިންގަޕޫރް އެއާލައިންގެ ބޯޓަކަށް ދަތުރު މަތީގައި އެރި ބާރުގަދަ ލޮޅުމާ ގުޅިގެން އަނިޔާވެގެން އައިސީޔޫގައި އަދިވެސް 22 މީހަކަށް ފަރުވާ ދެމުން އަންނަ ކަމަށް ބުނެފި އެވެ.
އެ މީހުންނަށް ފަރުވާ ދެމުން އަންނަނީ ތައިލޭންޑްގެ ބެންކޮކްގެ ސަމިތީވެޖް ސްރިނަކިރިން ހޮސްޕިޓަލްގަ އެވެ. ހޮސްޕިޓަލްގައި ޖުމްލަ 41 މީހަކަށް ފަރުވާ ދެމުން އަންނަ އިރު މީގެ ތެރޭގައި ސިންގަޕޫރް އެއާލައިންސްގެ ދެ ކްރޫއަކު ވެސް ހިމެނެ އެވެ.
އައިސީޔޫގައި ފަރުވާ ދެމުން އަންނަ މީހުންގެ ތެރޭގައި 2 އަހަރުގެ ކުއްޖަކު ވެސް ހިމެނެ އެވެ.
ލަންޑަނުން ފުރައިގެން ސިންގަޕޫރަށް ދަތުރު ކުރަނިކޮށް ބޯޓަށް އެރި ލޮޅުމާ ގުޅިގެން، ބޯޯޓް ބެންކޮޑް ޑައިވާޓްކޮށް، އަނިޔާވި މީހުންނަށް ފަރުވާ ދެމުން އަންނަ އިރު، އެ ހާދިސާގައި ބޯޓް ތެރޭގައި ހާޓްއެޓޭކެއް ޖެހިގެން 73 އަހަރުގެ އިނގިރޭސިވިލާތުގެ ފިރިހެނަކު މަރުވެފައިވެ އެވެ.
މި ހާދިސާ ހިނގި އިރު، ބޯޓުން ދަތުރުކުރި މީހުންގެ ތެރޭގައި އިނގިރޭސިވިލާތުގެ 47 މީހަކާއި އޮސްޓްރޭލިއާގެ 56 މީހެއްގެ އިތުރުން ސިންގަޕޫރުގެ 41 މީހަކު ހިމެނެ އެވެ. ބޯޓުން ދަތުރުކުރި މީހުންގެ ތެރެއިން 143 މީހަކު ފަހުން އެހެން ބޯޓެއްގައި ބެންކޮކުން ސިންގަޕޫރަށް ގެންގޮސްފައިވެ އެވެ. ހާދިސާ ހިނގި އިރު ބޯޓްގައި ޖުމްލަ 229 މީހަކު ތިއްބެވެ. އެއީ 211 ޕެސެންޖަރުންނާއި 19 ކްރޫއިންނެވެ.
ހޮސްޕިޓަލްގައި މިހާރު ފަރުވާ ދެމުން އަންނަ މީހުންނާ ބެހޭ ގޮތުން ސަމިތީވެޖް ސްރިނަކިރިން ހޮސްޕިޓަލްގެ ޑިރެކްޓަރު އަދިނުން ކިއްޓިރަތަނަޕައިބޫލް ވިދާޅުވީ އައިސީޔޫގައި ފަރުވާ ދެމުން އަންނަ 22 މީހުންނަކީ އެ މީހުންގެ ކަނދުރާ އާއި ބޮލާއި އަދި ސިކުނޑި އަށް އެކި ވަރުގެ ގެއްލުންވެފައިވާ މީހުން ކަމަށެވެ. އަދި މީގެ ތެރެއިން ވެސް ހަ މީހެއްގެ ހާލު ވަކިން ސީރިއަސް ކަމަށް ވިދާޅުވި އެވެ.
"އެންމެ ބޮޑަށް އަނިޔާވި މީހުންނަކީ ބެލެވޭ ގޮތުން ހާދިސާ ހިނގި އިރު ސީޓްބެލްޓް ވެސް ނާޅައި ތިބި މީހުން." އަދިނުން ވިދާޅުވި އެވެ.
ސިންގަޕޫރް އެެއާލައިންސްގެ ބޯޓަކަށް ދިމާވި މި ނުރައްކާތެރު ހާދިސާއާ ގުޅިގެން އެ އެއާލައިނުން މައާފަށް ވެސް އެދިފައިވެ އެވެ. މި ހާދިސާ މިހާރު އަންނަނީ އިތުރަށް ތަހުގީގު ކުރަމުންނެވެ.