ގަތަރުގައި ބާއްވާ "ދި އިންޓަނޭޝަނަލް ޔުނިވާސިޓީސް ޑިބޭޓިން ކޮމްޕެޓިޝަން" ގައި ބައިވެރިވުމަށް ރާއްޖޭގެ އިސްލާމީ ޔުނިވަސިޓީގެ ޓީމެއް އެ ގައުމށް ފުރައިފި އެވެ.
އިއްޔެ ފުރި ޓީމްގައި ހިމެނެނީ ޔުނިވާސިޓީގެ ބެޗްލާ އޮފް ޓީޗިން ޢަރަބިކް ލެންގުއޭޖް ކޯހުގައި ކިޔަވަމުން އަންނަ ތިން ދަރިވަރެއް ކަމަށްވާ، ސާރާ ބިންތު ޢާމިރު އިބްން ޢަލީއާއި ޢާއިޝަތު އީނާޝް އިބްރާހީމް އަދި އަލްޖީރިއާގެ ދަރިވަރެއް ކަމުގައިވާ ބެންބޫޒިއަން ނަރްދްޖިސް އެވެ.
މި ދަރިވަރުންގެ ކޯޗެއްގެ ގޮތުގައި ވަޑައިގެންނެވީ އައިޔޫއެމްގެ ކުއްލިއްޔާ އޮފް ޢަރަބިކް ލެންގުއޭޖްގެ ޑީން ފައްޔާޒް އަލިމަނިކެވެ. ބަހުސް ޓީމްގައި ޔުނިވާސިޓީގެ ވައިސް ޗާންސެލަރު ޑރ. އަލީ ޒާހިރާއި ޑެޕިއުޓީ ވައިސް ޗާންސެލަރު އަހުމަދު އަމީން މުޙައްމަދު ވެސް ގަތަރަށް ވަޑައިގެންނެވި އެވެ.
އައިޔޫއެމުން ބުނީ ގަތަރުގެ ވެރިރަށް ދޯހާގައި "ދި އިންޓަނޭޝަނަލް ޔުނިވާސިޓީސް ޑިބޭޓިން ކޮމްޕެޓިޝަން" ކުރިއަށް ދާނީ އަންނަ ބުދަ ދުވަހާ ހަމައަށެވެ. މިއީ ދުނިޔޭގައި އަރަބި ބަހުން ބާއްވާ އެންމެ ބޮޑު ބަހުސް މުބާރާތެވެ.
މި އަހަރުގެ މުބާރާތުގައި 50 ގައުމަކުން 100 ޓީމު ހިމެނޭހެން 600 އަ ށްވުރެ ގިނަ ބައިވެރިން ވާދަކުރެ އެވެ.