ޑައިރެކްޓަރު ފަރުހާން އަޚްތަރު މީގެ ތިން އަހަރު ކުރިން އިއުލާންކުރި ފިލްމު "ޖީ ލޭ ޒަރާ" ގެ ޝޫޓިން މި އަހަރުގެ ތެރޭގައި ފަށަން އަމާޒު ހިފާފައިވާ ކަމަށް ރިޕޯޓްތައް ބުނެފި އެވެ.
އެ ފިލްމު އުފައްދާ އެކްސަލް އެންޓަޓައިންމަންޓާ ހަވާލާދީ ޕިންކްވިލާ އިން ބުނީ މި އަހަރުގެ އޮގަސްޓް މަހުގެ ތެރޭގައި ރަންވީރު ސިންގުގެ "ޑޮން 3" ގެ މަސައްކަތް ފެށުމަށް ފަހު، މި އަހަރުގެ ނިމުމުގެ ކުރިން "ޖީ ލޭ ޒަރާ" ގެ މަސައްކަތް ފަށަން ވެސް ފަރުހާން ޕްލޭންކޮށްފައިވާ ކަމަށެވެ
މި ރޯޑް-ޓްރިޕް ފިލްމަކީ އަންހެން ތިން އެކުވެރިއަކަށް ބިނާކޮށް ހަދާ އެއްޗެކެވެ. "ޖީ ލޭ ޒަރާ" ގެ ތަރިންނަކީ އާލިއާ ބަޓާއި ކެޓްރީނާ ކައިފްގެ އިތުރުން ޕްރިޔަންކާ ޗޯޕްޅާ އެވެ. ވަގުތު ދިނުމުގައި ހުރި ތާށިކަމާ ހެދި ޕްރިޔަންކާ މި ފިލްމުން ވަކިވިކަމުގެ ވާހަކަތަކެއް ވެސް މިދިޔަ އަހަރު ދެކެވިފައިވެ އެވެ. އަދި ފަހުން ކެޓްރީނާ ވެސް ފިލްމު ދޫކޮށްލިކަމުގެ އަޑުތަކެއް އެރ އެވެ.
އެކަމަކު އެ ވާހަކަ ފިލްމުގެ ޓީމުން ދޮގުކޮށްފައިވެ އެެވެ.
ޕްރިޔަންކާ ހޮލީވުޑް ޕްރޮޖެކްޓްތަކުގައި ބިޒީކޮށް އުޅޭ އިރު، އޭނަ އެންމެ ފަހުން ކުޅުނު ހިންދީ ފިލްމަކީ ފަރުހާނާ އެކީ ކުޅުނު 2019 ގެ "ދަ ސްކައި އިޒް ޕިންކް" އެވެ.
ޕިންކްވިލާ އިން ބުނީ އަހަރުގެ ފަހުކޮޅު "ޖީ ލޭ ޒަރާ" ގެ މަސައްކަތް ފަށަން އަމާޒު ހިފާފައި އޮތުމާ ގުޅިގެން ފިލްމުގެ ތިން ތަރިންގެ ތާރީހުތަކާ ގުޅޭ ގޮތުން ފަރުހާން ވަރަށް ގާތުން މިހާރު މަސައްކަތް ކުރަމުން އަންނަ ކަމަށެވެ.
ފަރުހާން ޑައިރެކްޝަނަށް ނުކުތީ ވެސް ވަރަށް ކާމިޔާބު ރޯޑް-ޓްރިޕް ފިލްމަކުންނެވެ. އެއީ އާމިރު ޚާނާއި ސައިފް އަލީ ޚާންގެ އިތުރުން އަކްޝޭ ކަންނާއާ އެކީ ގެނެސްދިން 2003 ގެ "ދިލް ޗާތާ ހޭ" އެވެ.