ޅެން ފަރުވާއަށް ކްލިނިކެއް ގާއިމުކުރުމަށް ނިންމި ކަމަށް ބުނެ ދައްކާ ވާހަކައާއި 'ށ'އިން ފެށޭ ބަސް އުފައްދަން މަސައްކަތްކުރާ ކަމަށް ބުނެ ފަތުރަމުންދަނީ ދޮގު ވާހަކަތަކެއް ކަމަށް ދިވެހި ލެންގުއޭޖް، ކަލްޗަރ އެންޑް ހެރިޓޭޖް މިނިސްޓަރު އާދަމް ނަސީރު އިބްރާހިމް ވިދާޅުވެއްޖެއެވެ.
އެ މިނިސްޓްރީން މިއަދު ކުރިއަށް ގެންދިޔަ ނޫސްވެރިންގެ ބައްދަލުވުގައި ވާހަކަ ދައްކަވަމުން މިނިސްޓަރު އާދަމް ނަސީރު ވިދާޅުވީ "އާމްދަނީ ހޯދުމަށް" ދޮގު ޚަބަރުތައް ފަތުރަމުން އަންނަކަމަށެވެ.
އެގޮތުން އައިޖީއެމްއެޗްގައި ޅެން ފަރުވާއަށް ކްލިނިކެއް ހަދާ ވާހަކައެއް ފެތުރިކަމަށާއި އެ ވާހަކައަކީ ދޮގެއް ކަމަށެވެ. އަދި 'ށ'އިން ފެށޭ ލަފުޒުތަކެއް އުފައްދަން އުޅޭކަމަށް ބުނެވެސް ފަތުރަނީ ދޮގު ވާހަކައެއް ކަމަށް މިނިސްޓަރު ވިދާޅުވިއެވެ.
"ރެކޯޑިން ބެއްލެވީމަ އެނގިލައްވާނެ އެ [ވާހަކަ] ނެތްކަން. އެއީ އަޅުގަނޑު ނުދައްކާ ވާހަކައެއް." މިނިސްޓަރު އާދަމް ނަސީރު ވިދާޅުވިއެވެ.
ސޯޝަލްމީޑިއާގައި މި ދެ ވާހަކަ ފެތުރުނުއިރު މި ވާހަކަތަކާ ގުޅިގެން ސަރުކާރަށް ފާޑުކިޔުން އޮތީ އަމާޒުވެފައެވެ. އަދި 'ށ'އިން ފެށޭ ބަސް އުފައްދާ ވާހަކައަށް ގިނަ ބައެއްގެ ފާޑުކިޔުން އަމާޒުވެފައިވެއެވެ.