މާދަމާ ދިރާސީ އާ އަހަރު ފަށަނީ

ބޮޑު ޗުއްޓީ އަށް ފަހު މާދަމާ ރާއްޖޭގެ އާ ދިރާސީ އަހަރު ފަށަން ތައްޔާރުވެއްޖެ އެވެ.

އެޑިއުކޭޝަން މިނިސްޓްރީން ބުނީ 2024-2025 ގެ ދިރާސީ އަހަރުގެ ކިޔެވުން ފެށުމަށް ވާން ޖެހޭ ހުރިހާ ތައްޔާރީތަކެއް މިހާރު ވެފައިވާ ކަމަށެވެ. ސްކޫލްތަކަށް ބޭނުންވާ ޓެކްސްޓް ފޮތްތައް ވެސް ފޮނުވުމުގެ މަސައްކަތް ފުލުހުންގެ އެހީތެރިކަމާ އެކީ ކުރިއަށް ގެންގޮސްފައިވެ އެވެ.

މާދަމާ ދިރާސީ އަހަރު ފަށާ އިރު، މި ދުވަސްވަރު ވަރަށް ބޮޑަށް މޫސުން ގޯސްވެ، އެކި ހިސާބުތަކަށް ވިއްސާރަވެފައިވާތީ އެޑިއުކޭޝަނުން ވަނީ ހަފުތާގެ ފުރަތަމަ ތިން ދުވަހުގެ ދަންފަޅީގެ ކިޔެވުން ތިން ގަޑިއިރަށް ވުރެ އިތުރު ނުވާ ގޮތަށް ކުރިއަށް ގެންދަން އަންގައިފަ އެވެ.

އެޑިއުކޭޝަން މިނިސްޓްރީން ބުނީ 96،000 އަށް ވުރެ ގިނަ ދަރިވަރުންނާ އެކު މާދަމާ ދިރާސީ އާ އަހަރުގެ ކިޔެވުން ފަށާ އިރު އޭގެ ތެރޭގައި ހިމެނެނީ 40،300 އެއްހާ އަންހެން ދަރިވަރުންނާ 42،700 އެއްހާ ފިރިހެން ދަރިވަރުން ކަމަށެވެ. ސަރުކާރުގެ 217 ސްކޫލެއްގައި 83،000 އެއްހާ ދަރިވަރުން ތައުލީމު ހާސިލުކުރާނެ ކަމަށާއި އޭގެ ތެރެއިން 17،000 އެއްހާ ދަރިވަރުންނަކީ މާލޭ ސަރަހައްދުގައި ތައުލީމު ހާސިލުކުރާ ދަރިވަރުން ކަމަށް ވެސް އެޑިއުކޭޝަން މިނިސްޓްރީން ބުންޏެވެ.

މީގެއިތުރުން ދިރާސީ އާ އަހަރު ސަރުކާރު ސްކޫލުތަކުގައި 12،662 މުދައްރިސުން މަސައްކަތް ކުރާނެ ކަމަށާއި އެއީ 10،729 ދިވެހި މުދައްރިސުންނާއި 1،933 ބިދޭސީ މުދައްރިސުން ކަމަށް ވެސް މިނިސްޓްރީން ބުންޏެވެ.

ދަރިވަރުން 2022-2023 ގެ ދިރާސީ އަހަރު ނިންމާލައި ބޮޑު ޗުއްޓީ އަށް ދިޔައީ މިދިޔަ މަހުގެ 30 ގަ އެވެ.