މި އަހަރުގެ ބޮޑު އީދު ފާހަގަކުރަން "އައްޑޫ އީދި ސަމާ" ގެ ނަމުގައި ކުރިއަށް ގެންދަން ނިންމާފައިވާ ހަރަކާތްތަކުގެ ތެރޭގައި ހިމެނޭ މިއުޒިކް ޝޯގައި ލަވަކިޔުންތެރިޔާ ޝަމްވީލް (ބަރޯ) އާއި އޭނަގެ ބޭންޑް ފަމޯމްކުރާ ގޮތަށް ހަމަޖެހިއްޖެ އެވެ.
މިކަން ޝޯ އިންތިޒާމުކުރާ އައްޑޫ ސިޓީ ކައުންސިލްގެ އިތުރުން ބަރޯ ވެސް ޔަގީންކޮށް ދީފައިވެ އެވެ. މިދިޔަ އަހަރުގެ ބޮޑު އީދު ފާހަގަކުރަން އައްޑޫގައި ބޭއްވި ޝޯގައި ވެސް އޭނަ ބައިވެރިވެ އެވެ. ބަރޯ އަކީ ޓީވީއެމުން ގެނެސްދިން "މޯލްޑިވިއަން އައިޑޮލް" ސީޒަން ދޭއްގައި ވާދަކޮށްގެން އާންމުންގެ ސަމާލުކަން ލިބުނު ފަންނާނެކެވެ.
"އައްޑޫ އީދި ސަމާ 1445" ގެ ހަރަކާތްތައް ބާއްވަން ނިންމާފައި ވަނީ އަންނަ މަހުގެ 16-22 އަށެވެ. އަދި މިއުޒިކް ޝޯ އޮންނާނީ ޖޫން 22 ވަނަ ދުވަހުގެ ރޭ ހިތަދޫގަ އެވެ.
މި ޝޯގައި ޕަފޯމްކުރަން ބޭނުންވާ ފަންނާނުންނަށް ބައިވެރިވާން ކައުންސިލުން ފުރުސަތު ހުޅުވައިލީ މި މަހުގެ ކުރީކޮޅު އެވެ. އަދި ސުންގަޑި ހަމަވީ މި މަހުގެ 14 އަށެވެ.
ބަރޯގެ އިތުރުން ވެސް ބައެއް ބޭންޑްތަކާއި ފަންނާނުން އައްޑޫ އީދު ޝޯގައި ޕަފޯމްކުރާނެ އެވެ.