ދިރާސި އާ އަހަރުގެ ކިޔެވުން ފަށައިފި

ދިރާސީ އާ އަހަރުގެ ކިޔެވުން ރާއްޖޭގެ ހުރިހާ ސްކޫލުތަކެއްގައި މިއަދު ފަށައިފިއެވެ.

ދިރާސީ އާ އަހަރުގެ ކިޔެވުން މިއަދު ފެށިއިރު، މި ދުވަސްވަރު ރާއްޖެއަށް މޫސުން ގޯސްވެފައިވުމުން ފުރަތަމަ ތިން ދުވަހު ކިޔަވައިދިނުން ކުރިއަށް ގެންދިއުމަށް ހަމަޖެހިފައިވަނީ ގިނަ ވެގެން ތިން ގަޑިއިރުއެވެ.

96،000 އަށް ވުރެ ގިނަ ދަރިވަރުންނާ އެކު ދިރާސީ އާ އަހަރުގެ ކިޔެވުން ފަށާފައިވާއިރު އޭގެ ތެރޭގައި ހިމެނެނީ 40،300 އެއްހާ އަންހެން ދަރިވަރުންނާ 42،700 އެއްހާ ފިރިހެން ދަރިވަރުންނެވެ. އެޑިއުކޭޝަން މިނިސްޓްރީން ބުނެފައިވަނީ ސަރުކާރުގެ 217 ސްކޫލެއްގައި 83،000 އެއްހާ ދަރިވަރުން ތައުލީމު ހާސިލުކުރާނެ ކަމަށާއި އޭގެ ތެރެއިން 17،000 އެއްހާ ދަރިވަރުންނަކީ މާލޭ ސަރަހައްދުގައި ތައުލީމު ހާސިލުކުރާ ދަރިވަރުން ކަމަށެވެ.

މީގެއިތުރުން ދިރާސީ އާ އަހަރަށް އަތޮޅުތަކުން 1،126 ދަރިވަރުން މާލޭ ސަރަހައްދުގެ ސްކޫލުތަކަށް ވައްދާފައިވެއެވެ.

އެޑިއުކޭޝަން މިނިސްޓްރީން ބުނެފައިވަނީ ސަރުކާރު ސްކޫލުތަކުގައި 12،662 މުދައްރިސުން މަސައްކަތް ކުރާނެ ކަމަށާއި އެއީ 10،729 ދިވެހި މުދައްރިސުންނާއި 1،933 ބިދޭސީ މުދައްރިސުން ކަމަށެވެ.