މީގެ ދެ އަހަރު ކުރިން މަރުވި އިންޑިއާގެ މަޝްހޫރު ލަވަކިޔުންތެރިޔާ ކޭކޭ އެންމެ ފަހުން ރެކޯޑްކުރި ލަވަ އަންނަ ހުކުރު ދުވަހު ރިލީޒްކުރަން ހަމަޖެހިފައިވާ ފިލްމު "ސާވީ" ގައި ހިމެނޭނެކަން އިއުލާންކޮށްފި އެވެ.
އަބިނޭ ޑިއޯ ޑައިރެކްޓްކޮށްފައިވާ މި ފިލްމަކީ ބުޝަން ކުމާރުގެ ޓީ ސީރީޒް އާއި ވިޝޭޝް ފިލްމްސް ގުޅިގެން ހަދާފައިވާ ފިލްމެކެވެ. "ސާވީ" ގައި ހިމެނޭ ކޭކޭގެ ފަހު ލަވައިގެ ނަމަކީ "ވާދާ ހަމްްސޭ ކަރޯ" އެވެ. މި ލަވައިގެ ރެކޯޑިންގެ ތެރެއިން ނަގާފައިވާ ވީޑިއޯއެެއް ވެސް އާންމުކޮށްފައިވެ އެވެ.
މަގުބޫލު އެތައް ލަވައެއް ކިޔާފައިވާ ކޭކޭ އުމުރުން 53 އަހަރުގައި މަރުވީ މެއި 31، 2022 ގަ އެެވެ. ފާހަގަކޮށްލެވޭ ކަމަކީ އޭނަ ރެކޯޑް ކުރި އެންމެ ފަހު ލަވަ ހިމެނޭ މި ފިލްމު ވެސް ރިލީޒްކުރަނީ އެ ތާރީހުގައިކަމެވެ.
މި އަހަރުގެ އެންމެ އުންމީދީ ފިލްމުތަކުގެ ތެރޭގައި ހިމެނޭ "ސާވީ" ގެ ލީޑް ތަރިންނަކީ އަނިލް ކަޕޫރާއި ޕްރޮޑިއުސަރު ބުޝަންގެ އަންހެނުން ދިވްޔާ ކޯސްލާ ކުމާރުގެ އިތުރުން ހާޝްވަރްދަން ރާނޭ އެވެ.