އިންޑިއާގެ ގުޖުރާތުގެ އިމާރާތެއްގެ އަލިފާން ރޯވެ 24 މީހަކު މަރުވެ އެތައް ބަޔަކު ޒަހަމްވެއްޖެ އެވެ.
މީޑިއާތަކުން ރިޕޯޓްކޮށްފައިވާ ގޮތުގައި އިއްޔެ މެންދުރު ފަހު މި ހާދިސާ ހިނގާފައި ވަނީ ރާޖްކޮޓްގެ ގޭމް އާކޭޑްގަ އެވެ. އެތަނުގައި ރޯވެ 24 މީހަކު މަރުވެފައިވާ އިރު، ބައެއް މީހުންގެ ހަށިގަނޑު ފިހިފައިވާލެއް ބޮޑުކަމުން ކޮން ބައެއްކަން ދެނެގަންނަން ވެސް ދަތިވެފައިވާ ކަމަށް ފުލުހުންނާ ހަވާލާދީ މީޑިއާތަކުން ބުންޏެވެ.
ރާޖްކޮޓްގެ ޕޮލިސް ކޮމިޝަނަރު ރާޖް ބަރްގަވާ މީޑިއާތަކަށް ވިދާޅުވީ ހާދިސާގައި ޒަހަމް އިތުރު ބަތަކަށް ހޮސްޕިޓަލްގައި ފަރުވާ ދެމުން އަންނަ އިރު، އަލިފާން ރޯވި އިމާރާތުގެ ތެރޭގައި އަދިވެސް ބަޔަކު ތިބެދާނެ ކަމަށް ބެލެވޭ ކަމަށެވެ.
ގޭމް އާކޭޑް ރޯވީ އެތަނުގައި ގިނަ އަދަދެއްގެ ޒުވާނުންނާއި ކުޑަކުދިންތަކެއް ހަރަކާތްތެރިވަމުން ދަނިކޮށެވެ. ނަމަވެސް އަލިފާން ރޯވާން ދިމާވި ސަބަބެއް އަދި ސާފެއް ނުވެ އެވެ.
މި ހާދިސާ މިހާރު އަންނަނީ އިތުރަށް ތަހުގީގު ކުރަމުންނެވެ.
މިކަމާ ގުޅިގެން އިންޑިއާގެ ބޮޑުވަޒީރު ނަރެންދުރަ މޯދީ ވެސް ކަންބޮޑުވުން ފާޅުކުރައްވައި، ފުރާނަ ގެއްލުނު މީހުންގެ އާއިލާތަކަށް ތައުޒިޔާ ވެސް ފޮނުއްވާފައިވެ އެވެ.