އިލްމުވެރިންނަށް އިހުތިރާމް ކުރަން ޖެހޭނެ ކަމަށާއި އެއީ ރީތި އަހުލާގުގެ ތެރޭގައި ހިމެނޭ ކަމެއް ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމު އަލީ ސައީދު ވިދާޅުވެއްޖެ އެވެ.
ފަހަކަށް އައިސް ދީނީ އިލްމުވެރިންނަށް ބައެއް ފަރާތްތަކުން ބަދުބަސް ބުނެ، ތަފާތު ތުހުމަތުތެއް ކުރަމުން ދަނިކޮޮށް މިނިސްޓަރު ސޯޝަލް މީޑިއާ ޕޯސްޓެއްގައި މިއަދު ވިދާޅުވީ އިސްލާމީ އުންމަތަށް ޚިދުމަތް ކުރައްވާފައިވާ ހެޔޮ ލަފާ އެންމެހައި އިލްމުވެރިންނަށް އިޙުތިރާމް ކޮށް ހެޔޮ ދުޢާކުރުމަކީ މުސްލިމުންގެ އަޚުލާޤުގެ ތެރޭގައި ހިމެނޭ ކަމެއް ކަމަށެވެ.
"އިލްމުވެރިންނަކީ މައުޞޫމް ބައެއް ނޫން. ފިޤުހީ ނުވަތަ ޢަޤީދާއާ ގުޅުން ހުންނަ ކަންކަމުގައި ބޮޑެތި އިލްމުވެރިންގެ އިޖުތިހާދުގެ ތެރެއިން، ބައެެއްކަންކަމުގައި އެއްބޭކަލަކާ އަނެއް ބޭކަލެއްގެ މެދުގައި ރައުޔުގެ ތަފާތު ހުރުމަކީ ޠަބީޢީ ކަމެއް،" ޝަހީމު ވިދާޅުވި އެެވެ. "ޚިލާފު އުފެދިއްޖެ ޙާލަތުގައި މުސްލިމުންގެ މައްޗަށް ލާޒިމުގެ ވެގެންވަނީ ޤުރުއާނާއި ސުންނަތުގައި ހިފުން."