ފަލަސްތީނުގެ މިނިވަން ކަމަށް މަސައްކަތް ކުރާ ހަމާސް ޖަމާއަތުން އިޒްރޭލުގެ ތެލް އަވީވަށް ވަރުގަދަ ހަމަލާއެއް ދީފި އެވެ.
އިޒްރޭލުގެ މީޑިއާ ރިޕޯޓުތައް ބުނާގޮތުން މި ހަމަލާތައް ފޮނުވާލާފައިވަނީ އިޒްރޭލުން މިލިޓަރީ އޮޕަރޭޝަނެއް ހިންގަމުންދާ ރަފަހް ސިޓީންނެވެ. އެގޮތުން 10 ވަރަކަށް ވައިގެ ހަމަލާ ފޮނުވާލިއިރު، އޭގެތެރެއިން ބައެއް ތަކެތި އިޒްރޭލު އަސްކަރިއްޔާ އިން ވައްޓާލިއިރު، ބައެއް ތަކެތި އިޒްރޭލުގެ އެކި ސަރަހައްދުތަކަށް ވެއްޓުނު ކަމަށް ރިޕޯޓުތައް ބުނެ އެވެ.
މި ހަމަލާގެ ޒިންމާ ހަމާސް ޖަމާއަތުގެ އަސްކަރީ ގޮފި، އިއްޒުއްދީނުލް ގައްސާމް ބްރިގޭޑް (އަލް ގައްސާމް ބްރިގޭޑް) އިން ވަނީ އުފުލާފަ އެވެ. އެ ގޮފިން ވަނީ މިއީ އިޒްރޭލުން ފަލަސްތީނުގެ އާންމުންނާއި ދެކޮޅަށް ހިންގާ ގަތުލްއާންމާއި ދެކޮޅަށް ދިން ހަމަލާތަކެއް ކަމަށް ބުނެފަ އެވެ.
ހަމާސް އިން އިޒްރޭލަށް ވައިގެ ހަމަލާތަކެއް ދީފައިމިވަނީ ހަތަރު މަހަށްފަހު އެވެ.
އިޒްރޭލުން މި މަހުގެ 6 ވަނަ ދުވަހުން ފެށިގެން ރަފާހް އަށް ބޮން އަޅަން ފަށާފައިވާއިރު އެގައުމުން މީގެކުރިން ވަނީ މިލިޓަރީ އޮޕަރޭޝަނެއް ފަށަން ބޭނުންވާތީ ރަފާހްގައި ދިރިއުޅެމުންދާ އެންމެން ވަޒަން ދޫކޮށް ދިޔުމަށް ވެސް އަންގާފަ އެވެ. ނަމަވެސް މިކަން މިގޮތަށް ނުކުރުމަށް އެތައް ގައުމަކުން އިޒްރޭލު ކިބައިން ވަނީ އެދިފަ އެވެ.
މިދިޔަ އޮކްޓޫބަރު މަހުގެ 7 ވަނަ ދުވަހުން ފެށިގެން އިޒްރޭލުން ދެމުންދާ ހަމަލާތަކުގައި ގާޒާ އިން ޝަހީދުވި މީހުންގެ އަދަދު ވަނީ 35،000 އަށް ވުރެ މައްޗަށް އަރާފަ އެވެ.