އެމެރިކާގެ މަޝްހޫރު ލަވަކިޔުންތެރިޔާ ލޭޑީ ގާގާ އާ އަލްބަމެއް ނެރެން ތައްޔާރުވަމުން އަންނަ ކަމަށް ބުނެފި އެވެ.
އޭނަ 2020 ގައި ނެރުނު އަލްބަމް "ކްރިމެޓިކާ" ގެ ޓުއާ އަށް ބިނާކޮށް ހަދާފައިވާ ފިލްމު "ގާގާ ކްރޮމެޓިކާ ބޯލް" އެޗްބީއޯ މެކްސް އިން ރޭ ޕްރީމިއާކުރުމުގެ ކުރިން އޭގެ ޕްރޮމޯޝަންގެ ތެރެއިން ލޮސް އެންޖެލިސްގައި ކުރިިއަށް ގެންދިޔަ ސުވާލާއި ޖަވާބު ސެޝަނެއްގައި ގާގާ ބުނީ 7 ވަނަ އަލްބަމްގެ މަސައްކަތް ކުރަމުން އަންނަ ކަމަށެވެ. އެކަމަކު އަލްބަމް ނެރޭނެ ތާރީހެއް ހާމައެއް ނުކުރެ އެވެ.
މިހާރު ފިލްމީ ތަރިއެއްގެ ގޮތުގައި ވެސް މަޝްހޫރު ފަންނާނު ކޮވިޑްގެ ތެރޭގައި ވަރަށް ގިނަ ލަވަތަކެއްގެ މަސައްކަތްކޮށްފައިވާ ކަމަށާއި އާ އަލްބަމް ހިމެނޭ ލަވަތައް ވާނީ މީގެ ކުރިން ގެނެސް ދީފައިވާ ލަވަތަކާ ވަރަށް ތަފާތު މިއުޒިކެއް ހިމެނޭ އަލްބަމަކަށް ކަމަށެވެ.
"އާ އަލްބަމްގެ މަސައްކަތް ވަރަށް ބާރަށް އަދި ބުރަކޮށް ކުރިއަށް އެބަދޭ. ޔަގީންކަން ދޭނަން ވަރަށް ތަފާތު އަލްބަމެއް ގެނެސްދޭނެކަން." ގާގާ، 38، ބުންޏެވެ.
"އަ ސްޓާ އިޒް ބޯން" އާއި "ހައުސް އޮފް ގުޗީ" ފަދަ މަގުބޫލުތައް ފިލްމު ކުޅެފައިވާ ގާގާގެ ކުރިއަށް އޮތް ފިލްމަކީ މި އަހަރުގެ އޮކްޓޯބަރު 4 ގައި ރިލީޒްކުރަން ތާވަލުކޮށްފައިވާ މިއުޒިކަލް ސައިކޮލޮޖިކަލް ތުރިލާ "ޖޯކާ 2" އެވެ.