މިދުވަސްވަރު މާލެ އާއި އަތޮޅުތަކުގެ ތެރޭގައި ހޭންޑް ފުޓް އެންޑް މައުތް ބަލި ފެތުރެމުންދާތީ މި ބައްޔަށް ސަމާލުވުމަށް ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން އިލްތިމާސްކޮށްފިއެވެ.
އެޗްޕީއޭއިން މިއަދު ނެރުނު އެލާޓެއްގައި ބުނެފައިވަނީ މިބަލި އާންމުކޮށް ޖެހެނީ އުމުރުން އެއް އަހަރާއި ހަތަރު އަހަރާ ދެމެދުގެ ކުދިންނަށް ކަމަށާއި ހާއްސަކޮށް ޕްރީސްކޫލު ތަކުގައި ކިޔަވާ ކުދިންނާއި ސުކޫލު ތަކުގެ ގްރޭޑު އެކެއް އަދި ދޭއްގައި ކިޔަވާ ތުއްތު ކުދިންގެ މެދުގައި މިބަލި ފެތުރިގެން ދިއުމުގެ ފުރުސަތު ބޮޑު ކަމަށެވެ.
ހޭންޑް ފުޓް އެންޑް މައުތް ބައްޔަކީ ގައިގޯޅިވުމުގެ ތެރޭގައި ބަލިޖެހިފައިވާ ކުއްޖެއްގެ ކުޅު، އަރިދަފުސް، ބޮޑުކަމުދާ ނަޖިސް އަދި ހަމުގެގައި ނަގާ ފޮޅުން ނިކުންނަ ދިޔަ އެހެން ކުއްޖެއްގެ ގައިގަ ޖެހުމުންނެވެ. މި ބަލިޖެހުމުން އެންމެ ފުރަތަމަ ފެންނަ އަލާމަތް ތަކަކީ ހުން އައުމާއި ކާހިތް ނުވުމާއި ވަރުބަލިވުމާއި އަދި ގައިގަ ރިއްސުމާއެކު ކަރުތެރެ ފާރުވުން ފަދަ ކަންކަމެވެ.
އެޗްޕީއޭއިން ބުނީ މި ބަލި ޖެހިފައިވާ ކުދިން ސްކޫލަށް ނުފޮނުވުމަށް އިލްތިމާސްކުރާ ކަމަށެވެ. އަދި ބަލި ޖެހިފައިވާ ކުދިން ގެންގުޅޭ ތުވާލި، ތަށި އަދި ކުޅޭ ތަކެތި ރަނގަޅަށް ދޮވެ ސާފުކޮށްގެން ނޫނީ އެހެން ކުދިން ބޭނުން ނުކުރުމަށާއި، ކުދިންގެ ސާފުތާހިރުކަމާއި އެކުދިން އުޅޭ މާހައުލުގެ ސާފުތާހިރުކަމަށް ހާއްސަ ސަމާލުކަމެއް ދިނުމަށާއި ބަލި ޖެހިފައިވާ ކުދިންނަށް ކުޅި އަދި ހޫނުކޮށް ހުންނަ ކާބޯތަކެތި ނުދިނުމަށް އިލްތިމާސްކުރާ ކަމަށެވެ.