އިޒްރޭލުން ފަލަސްތީނުގެ ގާޒާގެ ރަފަހް ސިޓީ އަށް ވައިގެ ހަމަލާތަކެއްދީ 35 މީހުން ޝަހީދުކޮށްލައިފި އެވެ.
ގާޒާގެ ހެލްތު މިނިސްޓްރީން ބުނީ މި ހަމަލާ އިޒްރޭލުން އަމާޒުކޮށްފައިވަނީ ރަފަހްގެ އުތުރުގައި ގާއިމުކޮށްފައިވާ ރެފިއުޖީ ކޭމްޕަކަށް ކަމަށެވެ. މި ހަމަލާގައި ޝަހީދުވި މީހުންގެ ތެރޭގައި ގިނައީ އަންހެނުންނާއި ކުޑަކުދިން އެވެ.
މީޑިއާ ރިޕޯޓުތައް ބުނާގޮތުން އިޒްރޭލުން ވަނީ މި ރެފިއުޖީ ކޭމްޕަށް ވައިގެ 8 ހަމަލާ އަމާޒުކޮށްފަ އެވެ. އިޒްރޭލުގެ އަސްކަރިއްޔާ އިން ވަނީ މި ހަމަލާ ދީފައިވަނީ ހަމާސް ޖަމާއަތުގެ އިސް ފަރާތްތަކެއް ދިރިއުޅެމުންދާ ތަނަކަށް ކަމަށް ބުނެފަ އެވެ. އަދި މި ހަމަލާ ދީފައިވަނީ ބައިނަލްއަގުވާމީ ގާނޫނުތަކާއި އެއްގޮތްވާ ގޮތުގެ މަތީން ކަމަށްވެސް ބުނެފައިވެ އެވެ.
މި ހަމަލާދީފައިވާއިރު އިޒްރޭލުން ރަފަހް ސިޓީ އަށް ހަމަލާދިނުން ވަގުތުން ހުއްޓާލަން އިންޓަނޭޝަނަލް ކްރިމިނަލް ކޯޓް (އައިސީޖޭ) އިން މިދިޔަ ހުކުރު ދުވަހު ވަނީ އަމުރުކޮށްފަ އެވެ.
އިޒްރޭލުން މި މަހުގެ 6 ވަނަ ދުވަހުން ފެށިގެން ރަފާހް އަށް ބޮން އަޅަން ފަށާފައިވާއިރު އެގައުމުން މީގެކުރިން ވަނީ މިލިޓަރީ އޮޕަރޭޝަނެއް ފަށަން ބޭނުންވާތީ ރަފާހްގައި ދިރިއުޅެމުންދާ އެންމެން ވަޒަން ދޫކޮށް ދިޔުމަށް ވެސް އަންގާފަ އެވެ. ނަމަވެސް މިކަން މިގޮތަށް ނުކުރުމަށް އެތައް ގައުމަކުން އިޒްރޭލު ކިބައިން ވަނީ އެދިފަ އެވެ.
މިދިޔަ އޮކްޓޫބަރު މަހުގެ 7 ވަނަ ދުވަހުން ފެށިގެން އިޒްރޭލުން ދެމުންދާ ހަމަލާތަކުގައި ގާޒާ އިން ޝަހީދުވި މީހުންގެ އަދަދު ވަނީ 35،000 އަށް ވުރެ މައްޗަށް އަރާފަ އެވެ.