ރާއްޖޭގެ ރައްޔިތުންގެ މަޖިލީހުގެ އާ މެންބަރުން މާދަމާ ހުވާކުރަން ތައްޔާރުވެއްޖެ އެވެ.
ވިހި ވަނަ މަޖިލީހުގައި 93 މެންބަރުން ތިއްބަވާނެ އެވެ. އާ މަޖިލީހަށް މެންބަރުން އިންތިހާބުކުރީ މިދިޔަ މަހުގެ 21 ގަ އެވެ. އެ އިންތިހާބުގައި ޕާޓީތަކުންނާއި އަމިއްލަ މެންބަރުން ހިމެނޭހެން ޖުމްލަ 368 ކެންޑިޑޭޓުން ވާދަކުރި އެވެ.
މިހާރު ވެރިކަން ކުރާ ޕާޓީ ޕީއެންސީން އެކަނި އިންތިހާނުގައި 66 ގޮނޑި ކާމިޔާބުކުރި އެވެ. އަދި އަމިއްލަ ގޮތުން އިންތިހާބުގައި ވާދަކޮށް ގޮނޑި ކާމިޔާބު ކުރެއްވި 11 މެންބަރުންގެ ތެރެއިން ގިނަ މެންބަރުން މިހާރު ޕީއެންސީއާ ގުޅިވަޑައިގެންފައިވާތީ އެ ޕާޓީ އަށް ވަނީ މަޖިލީހުގެ ސުޕަ މެޖޯރިޓީ ލިބިފަ އެވެ.
އާ މަޖިލީހުން ރާއްޖޭގެ އެންމެ ބޮޑު ޕާޓީ، އެމްޑީޕީ އަށް ލިބުނީ އެންމެ 12 ގޮނޑި އެވެ.
މާދަމާ ހެނދުނު 9:00 މަޖިލިސް ހުވާކުރުމުގެ ރަސްމިއްޔާތު ބާއްވައި، ފުރަތަމަ ޖަލްސާ ހެނދުނު 10:15 ގައި ފަށާ އިރު އެންމެ ފުރަތަމަ މަސައްކަތަކަށް އޮންނާނީ މަޖިލީހުގެ ރައީސާއި ނައިބު ރައީސް ހޮވުމެވެ. ޕީއެންސީން ވަނީ މަޖިލީހުގެ ރައީސަކަށް ފޮނަދޫ ދާއިރާގެ އިންތިހާބީ މެންބަރު އަބްދުއްރަހީމް އަބްދުﷲ (އަދުރޭ) އަދި ނައިބު ރައީސަކަށް ދިއްގަރު ދާއިރާގެ މެންބަރު މުހައްމަދު ނާޒިމް ކަނޑައަޅަން ނިންމައިފަ އެވެ.
މަޖިލީހުން ބުނީ މާދަމާގެ ޖަލްސާގެ ރިޔާސަތު ބަލަހައްޓަވާނީ މީދޫ ދާއިރާގެ މެންބަރު އަހުމަދު ސިޔާމް މުހައްމަދު ކަމަށެވެ.
މާދަމާ އާ މަޖިސް ހުވާކުރަން ތައްޔާރުވަމުން އަންނަ އިރު، އިންތިހާބީ މެންބަރުން މަޖިލީހުގެ މާހައުލަށް އަހުލުވެރި ކުރުމަށް ޕްރޮގްރާމެއް ވެސް ކުރިއަށް ގެންގޮސްފައިވެ އެވެ.
ދައުރު ހަމަވާ 19 ވަނަ މަޖިލީހަކީ 87 މެންބަރުން ހިމެނޭ މަޖިލީހެކެވެ.