ދައުލަތަށް ގެއްލޭ ފައިސާ އަނބުރާ ހޯދުމާ ބެހޭ ޤާނޫނެއް އެކުލަވާލުމުގެ މަސައްކަތް ކުރަމުން އަންނަ ކަމަށް އެންޓި-ކޮރަޕްޝަން ކޮމިޝަން (އޭސީސީ) އިން ބުނެފި އެވެ.
ޕީއެސްއެމްގައޮ ކޮމިޝަންގެ ރައީސް އާދަމް ޝާމިލް ވިދާޅުވީ އޭސީސީގެ ގާނޫނު މިހާރު އޮތް ގޮތުން ކުށުގެ ތެރެއިން ދައުލަތައް ގެއްލިގެންދާ ފައިސާ އަނބުރާ ހޯދުމުގެ އެއްވެސް ބާރެއް އަދި މަސްޢޫލީއްޔަތެއް ކޮމިޝަނަށް ނޯންނަ ކަމަށެވެ. އަދި ކޮމިޝަނުގެ ޒިންމާއަކަށްވެފައި އޮންނާނީ ކަން ހިނގި ގޮތް ބަލައި ފައިސާ އަނބުރާ ހޯދުމުގައި ޒިންމާވާ ފަރާތްތަކަށް އެކަން އެންގުން ކަމަށް ވެސް ވިދާޅުވިއެވެ.
"ކުރިއަށް އޮތް ތާނގައި އަޅުގަނޑުމެން އެގޮތަށް އަންގާފައި ހުރި އެންގުންތަކަށް ބަލައި، މުއައްސަސާތަކަށް އަޅަން ޖެހޭ ފިޔަވަޅު އެޅުމުގެ ވިސްނުމެއް އަޅުގަނޑުމެން މިހާރު މި ގެންގުޅެނީ،" ޝާމިލް ވިދާޅުވި އެވެ. "އެގޮތަށް ޢަމަލު ކުރުމުގައި، ކުރާނެ ގޮތުގެ އުސޫލެއް އެކުލަވާލައި އެ ތަންފީޒު ކުރުމަށްޓަކައި ކުރަން ޖެހޭ މަސައްކަތް ކުރުމުގެ ފައިނަލް މަރުޙަލާގައި އަޅުގަނޑުމެން މި ތިބީ."
އޭނަ ވިދާޅުވީ ގެއްލޭ ފައިސާ އަނބުރާ ހޯދުމުގެ ނިޒާމު ހަރުދަނާ ކުރުމަށް އޭސީސީން މަސައްކަތް ކުރަމުން އަންނަ އިރު، އެކަމަށް ގާނޫނެއް އެކުލަވާލުމުގެ މަސައްކަތް މިހާރު ކުރަމުން އަންނަ ކަމަށެވެ.
"ގެއްލިދާ ފައިސާ އަނބުރާ ދައުލަތައް އިޔާދަކުރުމުގެ ވަރުގަދަ ނިޒާމެއް އެބަ ބޭނުންވޭ. އަޅުގަނޑުމެން އެ ދައިރާގެ ދިރާސާއެއް މިދިޔަ ދެ އަހަރުތެރޭ ކޮށްފައިވާނެ. އަދި ގުޅުން ހުރި މުއައްސަސާތައް އޭގެ މައްޗަށް އަމަލު ކުރާނެ ނިޒާމެއް ޤާއިމްކޮށް، އޭގެ މޮޑެލް ޤާނޫނެއް ތައްޔާރުކުމުގެ އެންމެ ފަހު މަރުހަލާގަ މިތިބީ،" ޝާމިލް ވިދާޅުވި އެވެ. "އެ މަސައްކަތް ކުރުމަށް ފަހު އެ ޤާނޫނާއި ގުޅޭގޮތުން ކަމާގުޅުންހުރި މުއައްސަސާތަކާއެކު މަސައްކަތްކުރުމުގެ މަޝްރޫޢުއެއް ހިންގާނަން."