މަސްވެރިންނަށް އައިސް ލިބޭ ކެޕޭސިޓީ އިތުރުކުރުމަށް ކުރެވޭ މަސައްކަތުގެ ތެރެއިން މި ސަރުކާރު ވެރިކަމާ ހަވާލުވިފަހުން 11 އައިސް ޕްލާންޓެއްގެ މަސައްކަތް މިފްކޯއާ ހަވާލުކުރެވިފައިވާ ކަމަށް ފިޝަރީޒް މިނިސްޓަރު އަހުމަދު ޝިޔާމް ވިދާޅުވެއްޖެއެވެ.
އިއްޔެ ކުރިއަށް ގެންދިޔަ ނޫސްވެރިންގެ ބައްދަލުވުމުގައި ވާހަކަ ދައްކަވަމުން މިނިސްޓަރު ޝިޔާމް ވިދާޅުވީ، އައިސް ކެޕޭސިޓީ އިތުރުކުރުމަކީ ރައީސް ޑރ. މުހައްމަދު މުއިއްޒުގެ މެނިފެސްޓޯގައި ހިމެނޭ ކަމެއް ކަމަށެވެ. އަދި އެ މަސައްކަތް މިހާރުވެސް ކުރިއަށްދާ ކަމަށް ވިދާޅުވިއެވެ.
އެގޮތުން މިސަރުކާރު ވެރިކަމާ ހަވާލުވިފަހުން 11 އައިސް ޕްލާންޓެއް މިފްކޯއާ ހަވާލު ކޮށްފައިވާ ކަމަށް މިނިސްޓަރު ޝިޔާމް ވިދާޅުވިއެވެ.
"ވެރިކަމާ ހަވާލުވިފަހުން 11 އައިސް ޕްލާންޓެއް މިހާރު ވާނީ މިފްކޯއާ ހަވާލު ކުރެވިފައި، މިފްކޯއިން އެ މަސައްކަތްތައް ކުރިއަށް ގެންދިއުމަށްޓަކައި. އެ މަސައްކަތްތައް މިހާރު އެވަނީ ޓެންޑަރިން މަރުހަލާގައި." މިނިސްޓަރު ޝިޔާމް ވިދާޅުވިއެވެ.
މިނިސްޓަރު ޝިޔާމް ވިދާޅުވީ، އުންމީދު ކުރަނީ އައިސް ޕްލާންޓްތައް މިއަހަރު ފަހުކޮޅު ނުވަތަ އަންނަ އަހަރު ކުރީކޮޅު ގާއިމުކުރެވި ހިދުމަތް ފެށުން ކަމަށެވެ.
ރާއްޖޭގެ މަސްވެރިކަމުގެ ސިނާއަތުގައި މަސައްކަތްކުރާ ފަރާތްތަކުން ފާޅުކުރާ އެންމެ ބޮޑު އެއް ޝަކުވާއަކީ އައިސް ލިބުމުގައި ހުރި ދަތިތަކެވެ. އެގޮތުން އައިސް ހޯދުމަށް ދުރަށް ދަތުރުކުރަންޖެހުމާއި ކިއުގައި ގިނައިރު ހޭދަކުރަންޖެހޭ ކަމުގެ ޝަކުވާ މަސްވެރިންކުރެއެވެ.