އައްޑޫގެ ތިން އަވަށެއްގައި ޕްރޮޖެކްޓް އޮފީސް ގާއިމު ކުރުމަށާއި މުވައްޒަފުން ތިބޭނެ އިމާރާތްތަކެއް ހޯދަން އެމްޑަބްލިއުއެސްސިން އިއުލާންކޮށްފި އެވެ.
އެ ކުންފުނިން ތަންތަން ކުއްޔަށް ހޯދަނީ ހިތަދު އާއި މަރަދޫފޭދޫގެ އިތުރުން ހުޅުމީދުންނެވެ. ތިން އަވަށުން ވެސް ކުއްޔަށް ހިފަން ބޭނުން ވަނީ ދެ ކޮޓަރި އާއި ދެ ފާހާނާ ހިމެނޭ ތަންތަން ކަމަށް ފެން ކުންފުނިން ބުންޏެވެ. އަދި ކުއްޔަށް ތަންތަން ހިފަން ނިންމާފައި ވަނީ އެއް އަހަރަށް ކަމަށާއި ކުއްޔަށް ދޭ ތަންތަން ވާން ޖެހޭނީ ކުންފުނިން ބޭނުންވެއްޖެ ނަމަ މުއްދަތު އިތުރު ވެސް ކޮށްދެވޭނެ ތަންތަނަށް ކަމަށް ފެން ކުންފުނިން ބުންޏެވެ.
އައްޑޫގެ ތިން އަވަށެއްގައި ޕްރޮޖެކްޓް އޮފީހާއި މުވައްޒަފުން ތިބޭނެ ތަންތަން ކުއްޔަށް ހޯދަން އިއުލާންކުރި އިރު، އައްޑޫގެ ފެނުގެ ނިޒާމު އަޕްގްރޭޑް ކުރަން މިދިޔަ މަހުގެ ތެރޭގައި ސަރުކާރުން ވަނީ އެމްޑަބްލިއުއެސްސީއާ ހަވާލުކޮށްފަ އެވެ.
އެ މަޝްރޫއު ކޮންސްޓްރަކްޝަން މިނިސްޓްރީން އެ ކުންފުންޏާ ހަވާލުކުރީ މިދިޔަ މަހުގެ 13 ގަ އެވެ. އަހަރު ދުވަހުގެ ތެރޭގައި ނިންމަން ޖެހޭ މި ޕްރޮޖެކްޓްގެ އަގަކީ 282 މިލިއަން ރުފިޔާ އެވެ.