ދުނިޔޭގެ ކަނޑުތަކުގެ ދުވަސް ފާހަގަކުރަން "އެންމެން މޫދަށް" ނަމުގައި ހަރަކާތެއް ކުރިއަށް ގެންދިއުމަށް ނިންމައިފިއެވެ.
ދުނިޔޭގެ ކަނޑުތަކުގެ ދުވަހުގެ ގޮތުގައި ފާހަގަ ކުރަނީ ޖޫން މަހުގެ 8 ވަނަ ދުވަހެވެ. ފިޝަރީޒް މިނިސްޓްރީން ވަނީ މިދުވަސް ކުލަ ގަދަކޮށް ފާހަގަ ކުރުމަށް ނިންމާފައެވެ.
އެގޮތުން ސިޓީ ކައުންސިލްތަކާއި އަތޮޅު ކައުންސިލްތަކާއި ރަށު ކައުންސިލްތަކާއި މުއައްސަސާތައް ގުޅިގެން އެއްވަގުތެއްގައި ރާއްޖޭގެ ގިނަ ބަޔަކު ކަނޑުމަށްޗަށް ނުކުތުމަށް ހިންގާ ހަރަކާތެއްގެ ގޮތުން "އެންމެން މޫދަށް" ކުރިއަަށް ގެންދިއުމަށް ވަނީ ނިންމާފައެވެ.
މި ހަރަކާތް ކުރިއަށް ގެންދިއުމަށް ހަމަޖެހިފައިވަނީ އެދުވަހު ހެނދުނު 9 ޖަހާއިރުއެވެ. ފިޝަރީޒް މިނިސްޓްރީން ބުނެފައިވަނީ އެންމެ ތަފާތުކޮށް އަދި އެންމެ ގިނަ މީހުންނާ އެއްކޮށް ހަރަކާތްތައް ހިންގާ 3 ކައުންސިލެއް ހޮވޭނެ ކަމަށެވެ.
އެންމެން މޫދަށް
ސިޓީ ކައުންސިލްތަކާއި އަތޮޅު ކައުންސިލްތަކާއި ރަށު ކައުންސިލްތަކާއި މުއައްސަސާތައް ގުޅިގެން އެއްވަގުތެއްގައި ރާއްޖޭގެ ގިނަ ބަޔަކު ކަނޑުމަށްޗަށް ނުކުތުމަށް ހިންގާ ހަރަކާތްއެންމެ ތަފާތު އަދި އެންމެ ގިނަ މީހުން ބައިވެރިވެގެން ހަރަކާތްތައް ހިންގާ 3 ކައުންސިލެއް… pic.twitter.com/3uwlTCdcCk
— Ministry of Fisheries and Ocean Resources (@MFORmv) May 27, 2024
މީގެއިތުރުން މިދުވަސް ފާހަގަކުރުމަށް ސްކޫލަކަށް ހުޅުވާލައިގެން މަޒުމޫނު ލިޔުމުގެ މުބާރާތަކާއި ކުރެހުމުގެ މުބާރާތެއް ކުރިއަށް ގެންދިއުމަށް ވަނީ ނިންމާފައެވެ. އަދި ސޯޝަލްމީޑިއާ މެދުވެރިކޮށް މުޅި ރާއްޖެއަށް ހުޅުވާލައިގެން ބާއްވާ ކުއިޒް މުބާރާތަކާއި، ކުޑަކުދިންނަށް ޑައިވް ހަރަކާތެއް ހިންގުމުގެ އިތުރުން މާލެ ސަރަޙައްދުގެ މުއައްސަސާތަކަށް ހުޅުވާލައިގެން މަސްރޭހެއް ބޭއްވުމަށް ނިންމާފައިވެއެވެ.