ބޮލީވުޑްގެ ޒުވާން ބަތަލާ އަނަންޔާ ޕާންޑޭގެ ފުރަތަމަ ވެބް ސީރީޒް "ކޯލް މީ ބައީ" މި އަހަރުގެ ސެޕްޓެމްބަރުގައި ޕްރީމިއާކުރަން ނިންމައިފި އެވެ.
ކަރަން ޖޯހަރްގެ ދަރުމާ ޕްރޮޑަކްޝަންގެ ވެބް ކޮންޓެންޓް ގޮފި، ދަރުމެޓިކް އެންޓަޓައިންމަންޓުން ހަދާފައިވާ މި ސީރީޒް ޕްރީމިއާކުރަން ހަމަޖެހިފައި ވަނީ ސެޕްޓެމްބަރު 6 ގަ އެވެ. އެކަން މިއަދު އިއުލާންކޮށް، "ކޯލް މީ ބައީ" ގެ ޕޯސްޓަރެއް ވެސް ދައްކާލައިފި އެވެ.
ވަރަށް ބޮޑަށް ގްލެމާ ދައްކުވައި ދޭނެ މި ސީރީޒަކީ ފެޝަނުގެ ދުނިޔޭގެ ނުފޫޒު ގަދަ ޒުވާން އަންހެނެއްގެ ވާހަކަ ކިޔައިދޭނެ އެއްޗެކެވެ. "ކޯލް މީ ބައީ" ގެ ކާސްޓްގައި ވީރް ދާސް، ވަރޫން ސޫދު އަދި ގުރްފަތޭ ޕިރްޒާދާ، ނިހާރިކާ ލީރާ ދަތު، މިނީ މާތޫރު، މުސްކާން ޖެފްރީ، ވިހާން ސަމަތު އަދި ލީސާ މިޝްރާ ފަދަ ފަންނާނުން އެވެ.
މި ސީރީޒަކީ މިދިޔަ އަހަރު ރިލީޒްކުރި ކަރަންގެ ފިލްމު "ރޮކީ އޯރް ރާނީ ކީ ޕްރޭމް ކަހާނީ" ގެ ސްކްރީންޕްލޭގައި ހިއްސާވި އިޝިތާ މޮއިތުރާގެ ސްކްރީންޕްލޭއަކަށް ހަދާފައިވާ އެއްޗެކެވެ.
އަނަންޔާގެ އެންމެ ފަހުގެ ފިލްމަކީ މިދިޔަ އަހަރުގެ "ކޯ ގަޔޭ ހަމް ކަހާ" އެވެ. އޭނަ ބޮލީވުޑަށް ނުކުތީ ދަރުމާގެ 2019 ގެ "ސްޓޫޑެންޓް އޮފް ދި އިޔާ 2" އިންނެވެ. އަނަންޔާގެ ކުރިއަށް ހުރި ފިލްމުތަކުގެ ތެރޭގައި "ކޮންޓްރޯލް" އާއި "ޝަންކަރާ" އަދި ހާއްސަ ފެނިލުމަކުން ފެންނާނެ "ބޭޑް ނިއުސް" ހިމެނެ އެވެ.