ހުސައިން މުނައްވަރު (ކިޑް) ޑައިރެކްޓްކޮށްފައިވާ ފިލްމު "ކަމަނާ" މި އަހަރުގެ އޮގަސްޓްގައި އޮލިމްޕަހަށް ގެންނަން ނިންމައި، އޭގެ ޓައިޓްލް ޓީޒާ ދައްކާލައިފި އެވެ.
މި ފިލްމު ހަދާފައި ވަނީ ރިޝްފާ އަބްދުއްސަމަދުގެ ވާހަކައަކަށް މަހުދީ އަހުމަދު ލިޔެފައިވާ ސްކްރީންޕްލޭއަކަށެވެ. އޭނަ އަކީ ކިޑް ކުރިން ޑައިރެކްޓަރު ފިލްމުތައް ކަމަށްވާ "ސަޒާ" އާއި "ދިލަކަނީ" ގެ ވެސް ސްކްރީން ރައިޓަރެވެ. މަހުދީގެ ސްކްރީންޕްލޭތަކަށް ގެނެސްދިން މަގުބޫލު ފިލްމުތަކުގެ ތެރޭގައި "ވާށޭ މަށާއެކީ" އާއި "ވިޝްކާ" އަދި "ހައްދު" ފާހަގަކޮށްލެވެ އެވެ.
އޮގަސްޓް 27 ގައި ޕްރީމިއާކުރަން ތާވަލުކޮށްފައިވާ "ކަމަނާ" ގެ ޝޫޓިން ނިންމައި، ޕޯސްޓް-ޕްރޮޑަކްޝަން މަރުހަލާގައި އޮތް އިރު، މީގެ މައިގަނޑު ކާސްޓްގައި ހިމެނެނީ ޔޫސުފް ޝަފީއު (ޔޫއްޕެ) އާއި މަރިޔަމް އައްޒަ އާއި އަރަމުން އަންނަ ޒުވާން ބަތަލާ އައިމިނަތު ރަޝްފާ (އާޝާ) އާއި މުހައްމަދު މަނިކާއި ނަތާޝާ ޖަލީލުގެ އިތުރުން މުހައްމަދު ރަޝީދު (ދަރާ) އެވެ.
"ކަމަނާ" އަކީ ކިޑްގެ އަމިއްލަ ޕްރޮޑަކްޝަން ހައުސް ކިޑް ޕްރޮޑަކްޝަނާއި ޕްރޮޑިއުސަރު އަލީ ޝާނީޒް އަހުމަދުގެ ސެޓާން ސްޓޫ ގުޅިގެން ގެނެސްދޭ ފިލްމެކެވެ.
މި ފިލްމަކީ ކިޑްގެ ތިން ވަނަ ފީޗާ ފިލްމެވެ. ކުދިން ކުޑަފޫޅުގެ ނަމުގައި އާންމުންގެ ތެރޭގައި މަޝްހޫރުވި ކިޑް އެންމެ ފަހުން ގެނެސްދިން ފިލްމަކީ 2016 ގެ "ނޭނގި ޔާރު ވަކިވީ" އެވެ.