އުތުރުތިލަފަޅުގައި ހަދާ ދަނޑުވެރިކަމަށް ހާއްސަ އިގުތިސާދީ ސަރަހައްދުގައި ކުކުޅު ބިސް އުފައްދާ ކާރުހާނާއެއް ހެދުމަށް ނިންމާފައިވާ ކަމަށް ދަނޑުވެރިކަމާ ބެހޭ މިނިސްޓަރު ޑރ. ޢައިޝަތު ރަމީލާ ވިދާޅުވެއްޖެ އެވެ.
މިނިސްޓްރީން އިއްޔެ ބޭއްވި ނޫސްވެރިންގެ ބައްދަލުވުމުގައި މިނިސްޓަރު އުތުރުތިލަފަޅުން ދަނޑުވެރިކަމުގެ ސަރަހައްދުގެ ގޮތުގައި 200 ހެކްޓަރުގެ ބިމެއް ކަނޑައަޅާފައިވާ ކަމަށެވެ. އަދި އެ ބިމުގައި ދަނޑުވެރިކަން ކުރަން ހަމަޖެހިފައި ވަނީ ދެ ފިޔަވައްސަކަށް ބަހައިލައިގެން ކަމަށާއި ފުރަތަމަ ފިޔަވަހީގައި ދަނޑުވެރިކަން ކުރާނީ 100 ހެކްޓަރުގައި ކަމަށްވިދާޅުވިއެވެ.
ރަމީލާ ވިދާޅުވީ، ދަނޑު ހެއްދުމުގެ އިތުރަށް ފުރަތަމަ ފިޔަވަހީގައި ކުކުޅު ބިސް ޕޯލްޓްރީ ފާމެއް ހެދުމަށް ވެސް ނިންމާފައިވާ ކަމަށެވެ. އެހެންކަމުން ކުކުޅުގެ ކާނާ ވެސް އެތަނުގައި ހައްދައި، ކުކުޅުގެ ސިއްހީ ކަންކަން ބަލަހައްޓާ ފެސިލިޓީއެއް ވެސް ހަދާނެ ކަމަށް ވެސް ވިދާޅު ވިއެވެ.
ދަނޑުވެރިކަމުގެ އިގުތިސާދީ ސަރަހައްދެއް ގާއިމްކުރުމަށް މޯލްޑިވްސް އިންޑަސްޓްރިއަލް ޑިވެލޮޕްމެންޓް ފްރީޒޯން ކުންފުނިން ޗައިނާގެ ހާބަ އިންޖިނިއަރިން ކޮމްޕެނީ ލިމިޓެޑާ އެކީ މިދިޔަ މާޗް މަހުގެ ތެރޭގައި އެއްބަސްވުމެއްގައި ސޮއިކޮށްފައިވެ އެވެ.