ފޭދޫން ދޫކުރަން ނިންމި ގޯތިތައް ހަވާލުކުރަން ފަށައިފި

އައްޑޫ ފޭދޫން ދޫކުރަން ނިންމި ގޯތިތަކުގެ އިން ވަކިކޮށް، ގޯތިތައް ލިބުނު ފަރާތްތަކާ ބިންތައް ހަވާލުކުރުމުގެ މަސައްކަތް ފޭދޫ އަވަށު އޮފީހުން ފަށައިފި އެވެ.

އަވަށު އޮފީހުން ބުނީ މި މަސައްކަތް މިހާރު ވަރަށް ބާރަށް ކުރިއަށްދާ ކަމަށެވެ. މި މަސައްކަތް އަވަށު އޮފީހުން ފެށީ މިދިޔަ އާދީއްތަ ދުވަހު އެވެ. ފޭދޫގެ ހިއްކިބުމުގެ އުތުރު ފަރާތުން 300 ގޯތި ދޫކޮށްފައިވެ އެވެ. އެއިން ކޮންމެ ގޯއްޗަކީ 1،500 އަކަފޫޓްގެ ގޯއްޗެވެ.

ފޭދޫ ބިން ދޫކުރަން ނިންމި ސަރަހައްދުން ގޯތި ލިބުނު މީހުންނަށް ބިންތައް ހަވާލުކުރުމުގެ މަސައްކަތް ކުރިއަށްދާ އިރު، އެ ސަރަހައްދުގައި އަންނަނީ ބޯހިޔާވަހި ކަމަށް ހާއްސަކޮށްގެން 75 ފްލެޓް ހެދުމުގެ މަސައްކަތް ވެސް ކުރަމުންނެވެ. މިދިޔަ ސަރުކާރުން ފެށި އެ މަޝްރޫއު ހަވާލުކޮށްފައި ވަނީ އެސްޖޭ ކޮންސްޓްރަކްޝަނާ އެވެ.

އައްޑޫން ގޯތި ދޫނުކުރާތާ ގިނަ އަހަރުތަކެއް ފަހުން ހަތަރު އަވަށަކުން 1،000 ގޯތީ ދޫކުރަން ކައުންސިލުން ނިންމީ މިދިޔަ އަހަރުގެ ކުރީކޮޅު އެވެ. އެގޮތުން ހިތަދޫން 500، ފޭދޫން 300، މީދޫން 100 އަދި ހުޅުދޫން 100 ގޯތި ދޫކުރަން ނިންމި އެެވެ. ފޭދު އާއި ހިތަދޫން 1،500 އަކަފޫޓްގެ ގޯތި ދޫކުރަން ނިންމި އިރު، ހުޅުމީދޫން ދޫކުރަން ނިންމީ 2،000 އަކަފޫޓްގެ ގޯއްޗެވެ.

ގޯއްޗަށް އެދި ހުޅުވައިލުމުން 4،000 އަށް ވުރެ ގިނަ މީހުން ކުރިމަތިވެފައިވެ އެވެ. އެހެންވެ ކައުންސިލުން ނިންމާފައި އޮތީ ޝަރުތު ހަމަވާ އެންމެންނަށް ވެސް ގޯތި ދޭށެވެ.