ޖުނައިދު ޚާނާއި ހުޝީ ކަޕޫރް އެކީގައި ކުޅޭ ރޮމޭންޓިކް ކޮމެޑީގެ ޝޫޓިން ފަށައިފި އެވެ.
މިޑް-ޑޭ އިން ބުނީ ރަސްމީކޮށް އަދި އިއުލާން ނުކުރާ މި ފިލްމުގެ ޝޫޓިން ފެށީ އިއްޔެ ކަމަށާއި ޝޫޓިން ކުރިއަށް ދަނީ މުމްބާއިގައި ކަމަށެވެ. އަދި މި ޝެޑިއުލް މަސް ދުވަހަށް ކުރިއަށް ދާނެ ކަމަށް ވެސް އެ ނޫހުން ބުންޏެވެ.
އާމިރު ޚާންގެ ދަރިފުޅު ޖުނައިދާއި ކުރީގެ ބަތަލާ ސްރީދޭވީގެ ހަގު ދަރިފުޅު ހުޝީ އެކީގައި ކުޅޭ ފިލްމަކީ 2022 ގެ ކާމިޔާބު ތަމަޅަ ފިލްމު "ލަވް ޓުޑޭ" ގެ ހިންދީ ރިމޭކެވެ. މީގެ ޑައިރެކްޓަރަކީ ޖުނައިދުގެ ބައްޕަ އާމިރުގެ އެންމެ ފަހުން ކުޅުނު ފިލްމު 2022 ގެ "ލާލް ސިންގް ޗައްޑާ" ޑައިރެކްޓްކުރި އަދުވައިތު ޗަންދަނެވެ.
ޖުނައިދު ކުޅުނު ފުރަތަމަ ފިލްމަކީ ޔާޝްރާޖް ފިލްމްސް (ވައިއާރްއެފް) އިން އަންނަ މަހު ނެޓްފްލިކްސް އަށް ދޫކޮށްލަން ތައްޔާރުވަމުން އަންނަ "މަހާރާޖް" އެވެ. ރިޕޯޓްތައް ބުނާ ގޮތުން އެ ފިލްމު ޕްރީމިއާކުރަން ނިންމާފައި ވަނީ ޖޫން 14 ގަ އެވެ.
ދާދި ފަހުން ޖުނައިދު ވަނީ ދެކުނުގެ ބަތަލާ ސައީ ޕައްލަވީއާ އެކީ ކުޅޭ ފިލްމެއްގެ މަސައްކަތް ވެސް ނިންމައިފަ އެވެ.
ހުޝީގެ ފުރަތަމަ ފިލްމަކީ މިދިޔަ ޑިސެމްބަރު މަހު ނެޓްފްލިކްސް އިން ގެނެސްދިން "ދި އާޗީސް" އެވެ. އަދި އޭނަ މީގެ ދުވަސްކޮޅެއް ކުރިން ވަނީ ސައިފް އަލީ ޚާންގެ ދަރިފުޅު އިބްރާހީމް އަލީ ޚާނާ އެކީ "ނާދާނިޔާން" ކިޔާ ރޮމޭންޓިކް ކޮމެޑީއެއްގެ މަސައްކަތް ނިންމައިފަ އެވެ.