ރާއްޖޭގައި ކައްކާ ގޭސް ފަސް މަސް ދުވަހަށް ރައްކާކުރެވޭނެ ނިޒާމެއް ގާއިމުކުރުމަށްޓަކައި ތިލަފުށީގައި ހުންނަ މޯލްޑިވް ގޭސްގެ އެލްޕީޖީ ސްޓޯރޭޖް ކެޕޭސިޓީ އިތުރު ކުރުމުގެ ގޮތުން އެލައިޑް އިންޝުއަރެންސް ކުންފުންޏާ އެކީ މޯލްޑިވް ގޭހުން އެކްސްޓާނަލް ފައިނޭންސިން އެއްބަސްވުމެއްގައި ސޮއިކޮށްފި އެވެ.
އެ އެއްބަސްވުމުގައި މޯލްޑިވް ގޭސްގެ ފަރާތުން އިއްޔެ ސޮއި ކުރެއްވީ ކުންފުނީގެ މެނޭޖިން ޑިރެކްޓަރު އަބްދުﷲ މުހައްމަދެވެ. އެލައިޑްގެ ފަރާތުން ސޮއިކުރެއްވީ މެނޭޖިން ޑިރެކްޓަރު ހުސައިން ލުވައިޒެވެ.
އަބްދުﷲ ވިދާޅުވީ ރާއްޖޭގައި ލިކުއިޑް ޕެޓްރޯލިއަމް ގޭސް ނުވަތަ ކައްކާ ގޭސް މި ވަގުތު ރައްކާކުރެވެނީ 35 ދުވަހަށް ބޭނުންވާ މިންވަރަށް ކަމަށެވެ. ނަމަވެސް އެ ކެޕޭސިޓީ އިތުރުކޮށް ފަސް މަސް ދުވަހަށް ބޭނުންވާ ގޭސް ރާއްޖޭގައި ރައްކާކުރެވޭނެ އިންތިޒާމު މިއަހަރުގެ ތެރޭގައި ހަމަޖެއްސުމަށް މަސައްކަތް ކުރަމުން އަންނަ ކަމަށް ވިދާޅުވި އެވެ.
"މި މަސައްކަތް ފަށާތާ ހައެއް ނުވަތަ ނުވަ މަސް ދުވަހުގެ ތެރޭގައި މަސައްކަތް ނިންމާލެވޭނެ،" އަބްދުﷲ ވިދާޅުވި އެވެ. "އޭރު ބޭރު ދުނިޔޭގައި ހަނގުރާމައެއް ހިނގި ކަމަށް ވިޔަސް ގޭސް ލިބުމަށް ދަތިވެދާނެހެން ހީވުމުގެ ކަންބޮޑުވުން ކުޑަކުރެވޭނެ."