ޗައިނާގެ މަޝްހޫރު އޮންލައިން ވިޔަފާރި ކުންފުނި، އަލީއެކްސްޕްރެސްގެ ގްލޯބަލް އެމްބެސެޑަރަކަށް އިނގިރޭސިވިލާތުގެ ކުރީގެ ފުޓްބޯޅަ ތަރި ޑޭވިޑް ބެކަމް ހަމަޖައްސައިފި އެވެ.
އޭނައާ އެކީ މިކަމުގެ އެއްބަސްވުމުގައި ސޮއިކުރީ އިއްޔެ އެވެ. ނަމަވެސް ބެކަމް އަށް ގްލޯބަލް އެމްބެސެޑަރުކަމުން ލިބޭ ފީއާ ބެހޭ އެއްވެސް މައުލޫމާތެއް ހާމަކޮށްފައެއް ނުވެ އެވެ.
އަލީއެކްސްޕްރެސްގެ ގްލޯބަލް އެމްބެސެޑަރަކަށް ބެކަމް މި ހަމަޖެއްސީ ޔޫއެފާއާ އެކީ އެކްސްކްލޫސިވް ޕާޓްނަޝިޕެއް ހަދާނެކަން މާޗް މަހުގެ ތެރޭގައި އެ ކުންފުނިން އިއުލާންކޮށްފައި ވަނިކޮށެވެ. އެހެންވެ އެކަމާ ގުޅުވައި ބެކަމް ބުނީ އަލީއެކްޕްރެސްގެ ސަބަބުން މި އަހަރުގެ ޔޫރޯއާ ފޭނުން މާ ބޮޑަށް ގާތްކޮށްދީ، ތަފާތު އެކި ހަދިޔާތައް ހޯދުމުގެ ފުރުސަތު ވެސް ފަހިކޮށް ދޭނެ ކަމަށެވެ.
ޔޫރޯ މުބާރާތުގައި އަލިއެކްސްޕްރެސްގެ ގިނަ ޕްރޮމޯޝަނަލް ހަރަކާތްތަކެއް ބެކަމް ކުރިއަށް ގެންދާނެ ކަމަށް މީޑިއާތަކުން ބުންޏެވެ.
މި އަހަރުގެ ޔޫރޯ މުބާރާތް ކުރިއަށް ދާނީ އަންނަ މަހުގެ 14 އިން ޖުލައި 14 އަށެވެ. މުބާރާތް ހޯސްޓް ކުރަނީ ޖަރުމަނުންނެވެ.