ޑައިރެކްޓަރު ޖަގަން ޝަކްތީގެ އާ ފިލްމު އަޖޭ ދޭވްގަންއާ އެކީ ހަދަން ނިންމާފައިވާ ކަމަށް ރިޕޯޓްތައް ބުނެފި އެވެ.
ޕިންކްވިލާ އިން ބުނީ އާ ޕްރޮޖެކްޓާ ގުޅޭ ގޮތުން މިހާތަނަށް އަޖޭއާ އެކީ ޖަގަން ގިނަ ބައްދަލުވުންތަކެއް ބާއްވާފައިވާ ކަމަށާއި އޭނަ އަށް ނެރޭޓްކޮށް ދިން ސްކްރިޕްޓާ މެދު ވަރަށް ހިތްހަމަޖެހިފައި ހުރި ކަމަށެވެ. އެހެންވެ މިހާރު ޕްލޭންކޮށްފައި އޮތް ގޮތުން ފިލްމުގެ ޝޫޓިން ފަށާނީ އަންނަ އަހަރުގެ ކުރީކޮޅު ކަމަށް ވެސް އެ ނޫހުން ބުންޏެވެ.
އަޖޭ އަކީ ބޮލީވުޑްގެ ތަރިންގެ ތެރެއިން އެންމެ ބިޒީ އެކެކެވެ. އޮގަސްޓްގައި ރިލީޒްކުރަން ހަމަޖެހިފައިވާ "ސިންގަމް އެގެއިން" ގެ މަސައްކަތް އޭނަ މިހާރު ކުރަމުން އަންނަ އިރު، އަންނަ މަހުގެ ތެރޭގައި "ދޭ ދޭ ޕިޔާރު ދޭ 2" ގެ ޝޫޓިން ފަށާނެ އެވެ. އަޖޭ ސޮއިކޮށްފައި ހުރި އިތުރު ފިލްމުތަކުގެ ތެރޭގައި "ސަން އޮފް ސަރުދާރު 2" ވެސް ހިމެނެ އެވެ.
މާޗްގައި ރިލީޒްކުރި "ޝައިތާން" އާއި މިދިޔަ މަހު ރިލީޒްކުރި "މައިދާން" އަށް ފަހު އަޖޭ ދެން އެންމެ އަވަހަށް ފެންނާނީ ޖުލައިގައި ގެނެސްދޭން ހަމަޖެހިފައިވާ "އޯރޯ މޭ ކަހާ ދަމް ތާ" އިންނެވެ. އަދި މި އަހަރުގެ ނޮވެމްބަރުގައި އޭނަގެ "ރެއިޑް 2" ރިލީޒްކުރާނެ އެވެ.
ދެވަނަ ފިލްމު އަޖޭއާ އެކީ ހަދަން ނިންމި ޖަގަން ޝަކްތީގެ ފުރަތަމަ ފިލްމަކީ އަކްޝޭ ކުމާރުގެ 2019 ގެ "މިޝަން މަންގަލް" އެވެ.