ރާއްޖެ އަށް މި އަހަރުގެ މިހާތަނަށް އިންޑިއާ އިން އައި ޓޫރިސްޓުންގެ އަދަދު 51،000 އަށް އަރައިފި އެވެ.
ޓޫރިސްޓް އެރައިވަލްސްގެ އެންމެ ފަހުގެ ތަފާސްހިސާބުތައް ދައްކާ ގޮތުން މި މަހުގެ 26 އާ ހަމައަށް އިންޑިއާ އިން ރާއްޖެ އައިސްފައި ވަނީ 51،536 ޓޫރިސްޓުންނެވެ. އިންޑިއާ އިން އަންނަ ޓޫރިސްޓުން މަޑުމަޑުން މަތިވަމުން އަންނަ އިރު، މި އަހަރު ފެށުނު ފަހުން އެ ގައުމު އޮތީ ރާއްޖޭގެ ޓޮޕް 10 މާކެޓްގެ 6 ވަނައިގަ އެވެ.
އެކަމަކު ފާހަގަކޮށްލަން ޖެހޭ ކަމަކީ އިންޑިއާ އަކީ މިދިޔަ އަހަރު ރާއްޖެ އަށް އެންމެ ގިނަ ޓޫރިސްޓުން އައި ގައުމުކަމެވެ.
އެ ގައުމުން އަންނަ ޓޫރިސްޓުން މި އަހަރު މަދުވާން ފެށީ މި ސަރުކާރުގެ ޑެޕިއުޓީ މިނިސްޓަރުންތަކެއް އިންޑިއާގެ ބޮޑުވަޒީރު ނަރެންދުރަ މޯދީ އާއި އެ ގައުމަށް ފުރައްސާރަކުރި މައްސަލައާ ގުޅިގެންނެވެ. އޭގެ ފަހުން ރާއްޖެ ބޮއިކޮޓްކުރަން ގޮވާލައި އިންޑިއާގެ މީހުން ސޯޝަލް މީޑިއާގައި ކެމްޕޭންތަކެއް ވެސް ހިންގާފައިވެ އެވެ.
އިންޑިއާ މުހިއްމު މާކެޓަކަށްވާތީ އެ ގައުމުގެ ޓޫރިސްޓުން އިތުރު ކުރަން ރާއްޖެ އިން އަންނަނީ އެކި ކަހަލަ މަސައްކަތްތައް މިހާރު ކުރަމުންނެވެ.
ރާއްޖެ އަށް މިހާރު އެންމެ ގިނަ ޓޫރިސްޓުން އަންނަނީ މި ސަރުކާރުން އެންމެ ގާތް ގުޅުމެއް ބާއްވާ ޗައިނާއިންނެވެ. މި މަހުގެ 26 ގެ ނިޔަލަށް އެ ގައުމުން 98،439 ޓޫރިސްޓުން އައިސްފައިވެ އެވެ. ދެވަނައިގައި އޮތް ރަޝިއާ އިން 88،122 ޓޫރިސްޓުން އައިސްފައިވާ އިރު، ތިން ވަނައިގައި އޮތް އިނގިރޭސިވިލާތުން 83،503 ޓޫރިސްޓުން އައިސްފައިވެ އެވެ.
ގަދަ 10 ގައި ދެން ހިމެނެނީ ގައުމުތަކަށް އިޓަލީ (74،430 ޓޫރިސްޓުން)، ޖަރުމަން (71،209 ޓޫރިސްޓުން)، ފްރާންސް (32،023 ޓޫރިސްޓުން)، އެމެރިކާ (30،824 ޓޫރިސްޓުން)، ސްވިޓްޒަލޭންޑް (21،282 ޓޫރިސްޓުން) އަދި ޕޮލޭންޑް (17،211 ޓޫރިސްޓުން) އެވެ.
މި އަހަރު ރާއްޖޭގެ ޓާގެޓަކީ މަދުވެގެން 2.3 މިލިއަން ޓޫރިސްޓުން ގެނައުމެވެ.