ރައްޔިތުންގެ މަޖިލީހުގެ ނައިބުރައީސްގެ މަގާމަށް ދިއްގަރު ދާއިރާގެ މެންބަރު އަހުމަދު ނާޒިމް އަދި މަރަދޫ ދާއިރާގެ މެންބަރު އަހްމަދުދީދީގެ ނަން ހުށަހަޅައިފިއެވެ.
މަޖިލީހުގެ ރައީސް އަދި ނައިބުރައީސް އައްޔަނު ކުރުމުގެ ޖަލްސާ ކުރިއަށްދާއިރު ސަރުކާރު ޕާޓީ ޕީއެންސީން މަޖިލީހުގެ ނައިބުރައީސްކަމަށް ހުށަހެޅީ ދިއްގަރު ދާއިރާގެ މެންބަރު އަހުމަދު ނާޒިމްގެ ނަމެވެ. ނާޒިމްގެ ނަން ހުށަހެޅުއްވީ ފޮނަދޫ ދާއިރާގެ މެންބަރު އަބްދުއްރަހީމް އަބްދުﷲއެވެ.
މީގެއިތުރުން އެމްޑީޕީން ވަނީ މަޖިލީހުގެ ނައިބުރައީސްގެ މަގާމަށް މަރަދޫ ދާއިރާގެ މެންބަރު އަހްމަދުދީދީގެ ނަން ހުށަހަޅާފައެވެ. އަހްމަދު ދީދީގެ ނަން ހުށަހެޅީ ވައިކަރަދޫ ދާއިރާގެ މެންބަރު ހުސައިން ޒިޔާދުއެވެ.
މަޖިލީހުގެ ރައީސްގެ މަގާމަށް ހުށަހަޅާފައިވަނީ ފޮނަދޫ ދާއިރާގެ މެންބަރު އަބްދުއްރަހީމް އަބްދުﷲ އަދި އެމްޑީޕީން ހިތަދޫ ދެކުނު ދާއިރާގެ މެންބަރު އިބްރާހީމް ނާޒިލްގެ ނަމެވެ.
މަޖިލިސް ރައީސް އަދި ނައިބުރައީސްގެ މަގާމަށް ބޭފުޅުން އައްޔަނު ކުރާނީ މެންބަރުންގެ މެދުގައި ނެގޭ ސިއްރު ވޯޓަކުންނެވެ.
ރައްޔިތުންގެ މަޖިލީހުގެ އިންތިހާބުގައި ވެރިކަންކުރާ ޕީއެންސީން ވަނީ މަޖިލީހުގެ 66 ގޮނޑި ކާމިޔާބުކޮށްފައެވެ. އަދި އިންތިހާބަށްފަހު، އަމިއްލަ ގޮތުން އިންތިހާބުގައި ވާދަކޮށް ކާމިޔާބުކުރި ބައެއް ބޭފުޅުން ވަނީ ޕީއެންސީއާ ގުޅިވަޑައިގެންފައެވެ. މިހާރު މަޖިލީހުގައި ޕީއެންސީގެ 75 މެންބަރުން ތިބޭނެއެވެ. މަޖިލީހުގައި އިދިކޮޅު އެމްޑީޕީގެ ތިބޭނީ 12 މެންބަރުންނެވެ. އަދި އެމްޑީއޭގެ 2 މެންބަރުން، ޖުމްހޫރީ ޕާޓީގެ އަދި އެމްއެންޕީގެ މެންބަރެއް މަޖިލީހުގައި އިންނާނެއެވެ. އަދި އަމިއްލަ 2 މެންބަރުން ތިބޭނެއެވެ.