ލޮލަށް ދިމާވި ސިއްހީ މައްސަލައިގެ ފަހުން ފިލްމުތަކުން ފުރުސަތު ލިބުން ހުއްޓިފައިވާ ކަމަށް މަޝްހޫރު އިނގިރޭސި ބަތަލާ ޖޫޑީ ޑެންޗް ބުނެފި އެވެ.
ލަންޑަންގައި މިހާރު ކުރިއަށްދާ ޗެލްސީ ފްލާވާ ޝޯގެ ތެރޭގައި "ޑެޑްލައިނަށް" ދިން އިންޓަވިއުއެއްގައި 89 އަހަރުގެ ހުނަރުވެރި ބަތަލާ ބުނީ ކެރިއަރާ މެދު މިހާރު ދެން ކުރާނެ މާ ބޮޑު އުންމީދެއް ވެސް ނެތް ކަމަށެވެ.
"ތެދަށް ބުނަންޏާ އަހަންނަށް މިހާރު ކިރިޔަ ކިރިޔާ ފެންނަ ވަރު ވަނީ. ލޮލުގެ ހާލަތު ވަރަށް ދަށް،" ކާމިޔާބު އެތައް ފިލްމެއް ކުޅެފައިވާ ތަޖުރިބާކާރު ބަތަލާ ބުންޏެވެ. "އެހެންވެ މިހާރު ފިލްމުތަކުން ނުލިބޭ ފުރުސަތެއް ވެސް."
އޮސްކާ އާއި ގޯލްޑެން ގްލޯބްގެ އިތުރުން ބަފްޓާ އެވޯޑް ވެސް ހޯދާފައިވާ ޖޫޑީ ބުނީ ދެން އޮތީ ރިޓަޔަކުރުން ކަމަށް ދެކޭ ކަމަށެވެ.
އޭނަ އެންމެ ފަހުން ފެނިފައި ވަނީ 2022 ގެ ކްރިސްމަސް މިއުޒިކަލް ކޮމެޑީ "ސްޕިރިޓެޑް" ގެ ހާއްސަ ފެނިލުމެއްގަ އެވެ. ޖޫޑީގެ އެކްޓިން ކެރިއަރު ފެށުނީ 1957 ގަ އެވެ. ފިލްމުތަކުގެ އިތުރުން ގިނަ އަދަދެއްގެ ޓީވީ އުފެއްދުންތަކާއި ތިއޭޓަ ޕްލޭތަކުގައި ވެސް އޭނަ މަސައްކަތްކޮށްފައިވެ އެވެ.
ޖޫޑީ މަސައްކަތްކޮށްފައިވާ ފިލްމުތަކުގެ ތެރޭގައި ޖޭމްސް ބޮންޑްގެ ބައެއް ފިލްމުތައް ވެސް ހިމެނެ އެވެ. އޭގެ ތެރޭގައި "ދަ ވޯލްޑް އިޒް ނޮޓް އިނަފް"، "ކެސިނޯ ރޯޔޭލް"، "ކްއަންޓަމް އޮފް ސޮލޭސް"، "ސްކައިފޯލް" އަދި "ސްޕެކްޓާ" ހިމެނެ އެވެ. އޭނަގެ ފާހަގަކޮށްލެވޭ އެހެން ބައެއް ފިލްމުތަކުގެ ތެރޭގައި "ޝޭކްސްޕެއާ އިން ލަވް"، "ޓީ ވިތު މުސޯލިނީ"، "ހެމްލެޓް"، "ވިކްޓޯރިއާ އެންޑް އަބްދުލް" އަދި "މާޑާ އޮން ދި އޮރިއެންޓް އެކްސްޕްރެސް" ހިމެނެ އެވެ.