ރައްޔިތުންގެ މަޖިލީހުގެ ނައިބުރައީސްގެ މަގާމަށް ދިއްގަރު ދާއިރާގެ މެންބަރު އަހުމަދު ނާޒިމް އިންތިހާބު ކޮށްފިއެވެ.
ރައްޔިތުންގެ މަޖިލީހުގެ ނައިބުރައީސް ހޮވުމަށް ވަނީ މެންބަރުންގެ މެދުގައި ސިއްރު ވޯޓެއް ނަގާފައެވެ.
މަޖިލިސް ނައިބުރައީސް ކަމަށް ނެގުނު ވޯޓުގެ ނަތީޖާ:
1- ދިއްގަރު ދާއިރާގެ މެންބަރު އަހުމަދު ނާޒިމް – 80 ވޯޓު
2- މަރަދޫ ދާއިރާގެ މެންބަރު އަހްމަދުދީދީ – 12 ވޯޓު
މަޖިލީހުގެ ރައީސްގެ މަގާމަށް ހޮވާފައިވަނީ ފޮނަދޫ ދާއިރާގެ މެންބަރު އަބްދުއްރަހީމް އަބްދުﷲއެވެ. އަބްދުއްރަހީމަށް 71 ވޯޓު ލިބުނުއިރު ރައީސް ކަމަށް އަބްދުއްރަހީމާ ވާދަކުރެއްވި ހިތަދޫ ދެކުނު ދާއިރާގެ މެންބަރު އިބްރާހީމް ނާޒިލްއަށް ލިބުނީ 14 ވޯޓެވެ.
ޤާނޫނުއަސާސީގައި ބުނެފައިވަނީ ރައްޔިތުންގެ މަޖިލީހުގެ ފުރަތަމަ ޖަލްސާގައި އެ މަޖިލީހުގެ މެންބަރުންގެ ތެރެއިން އެ މަޖިލީހުގެ ރައީސަކާއި ނައިބުރައީސެއް، އެ މަޖިލީހުގެ ސިއްރު ވޯޓަކުން އިންތިޚާބުކުރާންވާނެ ކަމަށެވެ.
ރައްޔިތުންގެ މަޖިލީހުގެ އިންތިހާބުގައި ވެރިކަންކުރާ ޕީއެންސީން ވަނީ މަޖިލީހުގެ 66 ގޮނޑި ކާމިޔާބުކޮށްފައެވެ. އަދި އިންތިހާބަށްފަހު، އަމިއްލަ ގޮތުން އިންތިހާބުގައި ވާދަކޮށް ކާމިޔާބުކުރި ބައެއް ބޭފުޅުން ވަނީ ޕީއެންސީއާ ގުޅިވަޑައިގެންފައެވެ. މިހާރު މަޖިލީހުގައި ޕީއެންސީގެ 75 މެންބަރުން ތިބޭނެއެވެ. މަޖިލީހުގައި އިދިކޮޅު އެމްޑީޕީގެ ތިބޭނީ 12 މެންބަރުންނެވެ. އަދި އެމްޑީއޭގެ 2 މެންބަރުން، ޖުމްހޫރީ ޕާޓީގެ އަދި އެމްއެންޕީގެ މެންބަރެއް މަޖިލީހުގައި އިންނާނެއެވެ. އަދި އަމިއްލަ 2 މެންބަރުން ތިބޭނެއެވެ.