ބަތަލާ ކާޖޮލް އެކްޝަން ރޯލަކުން ފެންނާނެ ފިލްމު "މަހާރާގްނީ" ގެ ޓީޒާއެއް މިއަދު ދައްކާލައިފި އެވެ.
މި ފިލްމަކީ ނެޝަނަލް ހޯދާފައިވާ ތެލެގޫ ޑައިރެކްޓަރު ޗަރަން ގެނެސްދޭ ފިލްމެކެވެ. އޭނަ ކުރިން ޑައިރެކްޓްކުރި ފިލްމުތަކުގެ ތެރޭގައި "އޮޓޯގްރާފް" އާއި "ވެޓްރީ ކޮޑީ ކައްޓޫ" ހިމެނެ އެވެ. "މަހާރާގްނީ" އަކީ ޗަރަންގެ ފުރަތަމަ ހިންދީ ފިލްމެވެ. ކާޖޮލްގެ އިތުރުން މި ފިލްމުގެ ކާސްޓްގައި ޕްރަބޫދޭވާ ވެސް ހިމެނެ އެވެ.
އެހެންވެ "މަހާރާގްނީ" ވަނީ 1997 ގައި ރިލީޒްކުރި ތަމަޅަ ފިލްމު މިންސާރާ ކަނަވޫ (ސަޕްޕޭ) އަށް 27 އަހަރު ފަހު ކާޖޮލް އާއި ޕްރަބޫދޭވާ އެކީގައި ފެންނާނެ ފުރަތަމަ ފިލްމަށެވެ.
ދެ ތަރިންގެ އާ ފިލްމުގެ ޓީޒާ މިއަދު ދައްކައިލި ނަމަވެސް ފިލްމު ސިނަމާތަކަށް ގެންނާނެ ތާރީހެއް އަދި އިއުލާނެއް ނުކުރެ އެވެ. "މަހާރާހްނީ" ގެ ކާސްޓްގައި ނަސީރުއްދީން ޝާހާއި ޖިއްޝޫ ސެންގުޕްތާ އާއި ޒުވާން އެކްޓަރު އަދިތިޔާ ސީލް ވެސް ހިމެނެ އެވެ.
މިހާތަނަށް ކާމިޔާބު އެތައް ފިލްމެއް ކުޅެފައިވާ ކާޖޮލްގެ އެންމެ ފަހުގެ ފިލްމަކީ މިދިޔަ އަހަރު ނެޓްފްލިކްސް އިން ގެނެސްދިން އެންތޮލޮޖީ ފިލްމު "ލަސްޓް ސްޓޯރީސް 2" އެވެ. އޭނަ ދެން އެންމެ އަވަހަށް ފެންނާނީ އެ ޕްލެޓްފޯމުން ގެނެސްދޭން ހަމަޖެހިފައިވާ "ދޯ ޕައްތީ" އިންނެވެ.