"ރަފަޙް އަނދަނީ" ގެ ނަމުގައި އަންނަ ހުކުރު ދުވަހު އައްޑޫގައި ވެހިކަލް ބުރެއް ބާއްވަން ނިންމައިފި އެވެ.
މިއީ ފަލަސްތީނުގެ ރައްޔިތުންނާ އެކީ އައްޑޫ ރައްޔިތުން ތިބިކަން ހާމަކޮށް ދިނުމުގެ ގޮތުން ބާއްވާ ވެހިކަލް ބުރެކެވެ. މި ވެހިކަލް ބުރު ފަށަން ހަމަޖެހިފައި ވަނީ ހުކުރު ދުވަހު ހަވީރު ހިތަދޫ ސްކޫލް ކައިރިންނެވެ. އެއީ ހަވީރު 4:00 ޖަހާ އިރު އެވެ.
އެހެންވެ ވީހާ ވެސް ގިނަ ބަޔަކު ބުރުގައި ބައިވެރިވުމަށް "ރަފަޙް އަނދަނީ" ގެ ނަމުގައި ބާއްވާ ވެހިކަލް ބުރު އިންތިޒާމުކުރާ ނޫރުލް އިސްލާމް ޖަމިއްޔާ އާއި މިޝްކަތު ފައުންޑޭޝަނުން އެދިފައިވެ އެވެ.
ފަލަސްތީނުގެ ރައްޔިތުންނާ އެކީ އައްޑޫ ރައްޔިތުން ތިބިކަން ހާމަކޮށް ދޭން މީގެ ކުރިން އައްޑޫގައި ތަފާތު ހަރަކާތްތަކެއް ބާއްވާފައިވ އެވެ. އެގޮތުން މިދިޔަ އަހަރުގެ އޮކްޓޯބަރު 7 އިން ފެށިގެން އިޒްރޭލުން ހިންގަމުންދާ ޖަރީމާތަކާ ގުޅިގެން އަޑު އުފުލައި އަދި ފަލަސްތީނުގެ ރައްޔިތުންނަށް އެހީވާން ފައިސާ އެއްކުރަން ވެސް އައްޑޫގައި އެކި ފެންވަރުގައި މިހާތަނަށް ގިނަ ހަރަކާތްތަކެއް ހިންގާފައިވެ އެވެ.