އިޒްރޭލުން ފަލަސްތީނުގެ ގާޒާގެ ރަފަހް ސިޓީގެ ރެފިއުޖީ ޓެންޓަކަށް އިތުރު ހަމަލާއެއްދީ 21 މީހުން ޝަހީދުކޮށްލައިފި އެވެ.
މި ހަމަލާ ދީފައިވަނީ ރަފަހުގައި މީހުންނަށް ސަލާމަތުން ތިބެވޭނެ "ސޭފް ޒޯނެއް" ކަމަށް އިޒްރޭލުން ބުނެފައިވާ ސަރަހައްދެއްގައި ހުރި ރެފިއުޖީ ޓެންޓަކަށެވެ. މި ހަމަލާގައި ޝަހީދުވި މީހުންގެ ތެރެއިން 13 މީހުންނަކީ އަންހެނުންނެވެ.
މި ހަމަލާގައި އެތައް ކުޑަކުދިންނާއި އަންހެނުންނަކަށް އެކި ވަރުގެ އަނިޔާތައް ވެސް ލިބިފައިވާ ކަމަށް ރިޕޯޓުތައް ބުނެ އެވެ.
އިޒްރޭލުން ވަނީ މިދިޔަ އާދީއްތަ ދުވަހުގެރޭ ވެސް ރަފަހްގެ ރެފިއުޖީ ޓެންޓަކަށް އަމާޒުކޮށް ވައިގެ ހަމަލާތަކެއް ދީފަ އެވެ. އެ ހަމަލާގައި 45 މީހުން ޝަހީދުވެފައިވެ އެވެ.
މި ހަމަލާތައް ދެމުންދާއިރު އިޒްރޭލުން ރަފަހް ސިޓީ އަށް ހަމަލާދިނުން ވަގުތުން ހުއްޓާލަން އިންޓަނޭޝަނަލް ކްރިމިނަލް ކޯޓް (އައިސީޖޭ) އިން މިދިޔަ ހުކުރު ދުވަހު ވަނީ އަމުރުކޮށްފަ އެވެ.
އިޒްރޭލުން މި މަހުގެ 6 ވަނަ ދުވަހުން ފެށިގެން ރަފާހް އަށް ބޮން އަޅަން ފަށާފައިވާއިރު އެގައުމުން މީގެކުރިން ވަނީ މިލިޓަރީ އޮޕަރޭޝަނެއް ފަށަން ބޭނުންވާތީ ރަފާހްގައި ދިރިއުޅެމުންދާ އެންމެން ވަޒަން ދޫކޮށް ދިޔުމަށް ވެސް އަންގާފަ އެވެ. ނަމަވެސް މިކަން މިގޮތަށް ނުކުރުމަށް އެތައް ގައުމަކުން އިޒްރޭލު ކިބައިން ވަނީ އެދިފަ އެވެ.
މިދިޔަ އޮކްޓޫބަރު މަހުގެ 7 ވަނަ ދުވަހުން ފެށިގެން އިޒްރޭލުން ދެމުންދާ ހަމަލާތަކުގައި ގާޒާ އިން ޝަހީދުވި މީހުންގެ އަދަދު ވަނީ 35،000 އަށް ވުރެ މައްޗަށް އަރާފަ އެވެ.