ފަލަސްތީނުގެ ގާޒާގެ ދެކުނުގައި އޮންނަ ރަފަހް ސިޓީއަށް އިޒްރޭލުން ދެމުންގެންދާ ހަމަލާތަކާ ގުޅިގެން އެއް މިލިއަން މީހުން އެ އަވަށް ދޫކޮށް ގޮސްފައިވާ ކަމަށް އ.ދ އިން ބުނެފި އެވެ.
ފަލަސްތީން ރެފިއުޖީންނަށް ހާއްސަ އދ. ގެ އެޖެންސީން (ޔޫއެންއާރްޑަބްލިއުއޭ)ގެ އިސްވެރިއާ ފިލިއްޕޭ ލަޒަރަނީ ވިދާޅުވީ ފާއިތުވި ތިން ހަފްތާތެރޭ ރަފަހް ދޫކޮށް އެއް މިލިއަން މީހުން ގޮސްފައިވާ ކަމަށާއި ރަފަހްގެ އެކި ސަރަހައްދުތަކަށް ދަންވަރުގެ ވަގުތުތަކުގައި އިޒްރޭލުން ހަމަލާތައް ދެމުންދާ ކަމަށެވެ. އަދި ހަމަލާތަކާ ގުޅިގެން ޔޫއެންއާރްޑަބްލިއުއޭގެ މުވައްޒަފުންނަށް ވެސް މަސައްކަތް ކުރުމުގައި ހުރަސްތައް ކުރިމަތިވެ، ރަފަހް ދޫކޮށްދާން ތައްޔާރުވަމުންދާ ކަމަށާއި ރަފަހަށް އެކަށީގެންވާ އަދަދަކަށް އެހީގެ ތަކެތި މިހާރު ވަންނަމުން ނުދާ ކަމަށްވެސް ވިދާޅުވި އެވެ.
އެގޮތުން ސިއްހީ ސާމާނާއި ބޭސް ފަދަ ތަކެތި ހުސްވުމާ ގާތަށް ގޮސްފައިވާއިރު، ކަރަންޓާއި އިންޓަނެޓްގެ ހިދުމަތް ލިބުމުގައި ބޮޑެތި ދަތިތަކާ ކުރިމަތިލާން ޖެހިފައިވާ ކަމަށް އޭނާ ވިދާޅުވި އެވެ.
އިޒްރޭލުން މި މަހުގެ 6 ވަނަ ދުވަހުން ފެށިގެން ރަފާހް އަށް ބޮން އަޅަން ފަށާފައިވާއިރު، ފާއިތުވި ދުވަސްތަކުގައި އިޒްރޭލުން ވަނީ ރަފަހްގައި ރެފިއުޖީން ތިބޭ ޓެންޓުތަކަށް ވެސް ވައިގެ ހަމަލާތައް އަމާޒުކޮށްފަ އެވެ. އެ ހަމަލާތަކުގައި ގިނަ އަދަދަކަށް ކުޑަކުދިންނާއި އަންހެނުން ވަނީ ޝަހީދުވެފަ އެވެ.
މި ހަމަލާތައް ދެމުންދާއިރު އިޒްރޭލުން ރަފަހް ސިޓީ އަށް ހަމަލާދިނުން ވަގުތުން ހުއްޓާލަން އިންޓަނޭޝަނަލް ކްރިމިނަލް ކޯޓް (އައިސީޖޭ) އިން މިދިޔަ ހުކުރު ދުވަހު ވަނީ އަމުރުކޮށްފަ އެވެ.
މިދިޔަ އޮކްޓޫބަރު މަހުގެ 7 ވަނަ ދުވަހުން ފެށިގެން އިޒްރޭލުން ދެމުންދާ ހަމަލާތަކުގައި ގާޒާ އިން ޝަހީދުވި މީހުންގެ އަދަދު ވަނީ 35،000 އަށް ވުރެ މައްޗަށް އަރާފަ އެވެ.