ފަލަސްތީނުގެ ރައްޔިތުންގެ ހައްގުގައި މިއަދުން ފެށިގެން ޤުނޫތު ކިޔަން އަންގާނެ ކަމަށް އިސްލާމިކް މިނިސްޓްރީން ބުނެފިއެވެ.
އިސްލާމިކް މިނިސްޓްރީ މިއަދު ބުނެފައިވަނީ، ފަލަސްތީނުގެ ހިތްދަތި ހާލަތާގުޅިގެން، މިއަދުން ފެށިގެން މަޣުރިބު ނަމާދާއި ފަތިސް ނަމާދުގައި ޤުނޫނު ނާޒިލާ ކިއުމަށް އިމާމުންނަށް އަންގާނެ ކަމަށެވެ.
"މުސްލިމުންނަކީ އެއް ހަށިގަނޑެއް. އިސްލާމީ އުންމަތަށް ދިމާވެފައިވާ ހިތްދަތި މިވަގުތަކީ އިޚުލާސްތެރިކަމާއެކު ދުއާކުރަންވީ ވަގުތު." މީޑިއާތަކަށް ފޮނުވި މެސެޖުގައި ބުނެފައިވެއެވެ.
އިޒްރޭލުން ފަލަސްތީނަށް ދެމުންގެންދާ ހަމަލާތަކުގައި އާންމުން ދިރިއުޅޭ ގެތަކާއި ހޮސްޕިޓަލްތަކަށްވެސް ހަމާލާތައް އަމާޒުކޮށްފައިވެއެވެ.
މިދިޔަ އޮކްޓޫބަރު މަހުގެ 7 ވަނަ ދުވަހުން ފެށިގެން އިޒްރޭލުން ފަލަސްތީނުގެ ރައްޔިތުންނާ ދެކޮޅަށް ހިންގަމުންދާ ނަސްލުނައްތާލުމުގެ އަނިޔާވެރި އަމަލުތަކުގައި ޝަހީދުވި މީހުންގެ އަދަދު ވަނީ 35،000 އަށް ވުރެ މައްޗަށް އަރާފައެވެ. އަދި ފަލަސްތީނުގެ ގާޒާގެ ދެކުނުގައި އޮންނަ ރަފަހް ސިޓީއަށް އިޒްރޭލުން ދެމުންގެންދާ ހަމަލާތަކާ ގުޅިގެން އެއް މިލިއަން މީހުން އެ އަވަށް ދޫކޮށް ގޮސްފައިވާކަމަށްވެސް ރިޕޯޓް ކޮށްފައިވެއެވެ.