ރާއްޖޭގައި ޔޫއޭއީގެ ދިރުހަމާއި ޗައިނީސް ޔުއާން އިން މުއާމަލާތް ކުރެވޭނެ ގޮތް ހަދަން ނިންމާފައުިވާ ކަމަށް ބޭންކް އޮފް މޯލްޑިވްސް (ބީއެމްއެލް) އިން ބުންފި އެވެ.
ގައުމީ ބޭންކްގެ އަހަރީ ޖަލްސާގައި ރޭ ސީއީއޯ ކާލް ސްޓުމްކަވިދާޅުވީ، ކަސްޓަމަރުންގެ ބޭނުންތައް ހައްލުކޮށް ދިނުމަށް މަސައްކަތް ކުރަމުން އަންނަ އިރު، ދިރުހަމާއި ޔުއާން އިން ކަސްޓަމަރުންނާ މުއާމަލާތް ކުރެވޭނެ ގޮތަށް ސިސްޓަމްތައް ކޮންފިގަރޭޓްކޮށްފައިވާ ކަމަށެވެ.
"ދިރުހަމާއި އާއި ޔުއާން އިން މުއާމަލާތްކުރެވޭނެ ގޮތަށް ދާދި ފަހުން އަޅުގަނޑުމެންގެ ސިސްޓަމްތައް ވަނީ ކޮންފިގްރޭޓްކޮށްފައި،" އޭނަ ވިދާޅުވި އެވެ. "އަޅުގަނޑުމެންނަށް މިހާރު ޔުއާން އިން ސެޓްލްމަންޓްތައް ލިބެން ބޭނުންވާ ކަސްޓަމަރުންނަށް ޔުއާން އެކައުންޓްތައް ފޯރުކޮށްދީ، ކުރިއަށް އޮތްތަނުގައި ފައިސާ ދެއްކުމަށް މި ހިދުމަތް ބޭނުން ކުރެވޭނެ."
ކާލް ވިދާޅުވީ ބީއެމްއެލްގެ ކަސްޓަމަރުންގެ ބޭނުންތައް ފުއްދައި ދިނުމުގައި ބޭންކް އަބަދު ވެސް ދެމިއޮންނާނެ ކަމަށެވެ.
"ޑިރެކްޓަރުންގެ ބޯޑުން ދެއްވި އިރުޝާދާ ހިއްސާދާރުން ބީއެމްއެލްއަށް ކުރައްވާ އިތުބާރަށް އަޅުގަނޑު ޝުކުރު އަދާކުރަން. އަޅުގަނޑުމެން މަސައްކަތް ކުރަމުންދާނީ ރާއްޖޭގައި އެންމެން އިހުތިޔާރު ކުރާ ބޭންކަށްވުމަށް،" އޭނަ ވިދާޅުވި އެވެ. "މި އަމާޒަށް ވާސިލްވުމަށް އަޅުގަނޑުމެން މެދުކެނޑުމެއް ނެތި މަސައްކަ ތްކުރަމުން ދާނަން."
ބީއެމްއެލްގެ ރައުސުލްމާލުގެ އަގު 45 ބިލިއަން ރުފިޔާއަށް އަރަ އެވެ. އެ ބޭންކްގެ ކަސްޓަމަރުންގެ އަދަދު 340،000 އަށް ވުރެ ގިނަ އެވެ.