ރާއްޖޭގެ ކުދި އަދި މެދު ފަންތީގެ ވިޔަފާރިތަކަށް ސްރީ ލަންކާގައި ހުރި ފުރުޞަތުތައް ހޯދުމަށް، އެ ގައުމުގައި ހުންނަ ދިވެހި ސަފީރާއެކު ބިޒްނަސް ސެންޓަ ކޯޕަރޭޝަން (ބީސީސީ) އިން މަޝްވަރާކޮށްފި އެވެ.
ލަންކާ އަށް ކަނޑައެޅުއްވި އާ ސަފީރު މަސްއޫދު އިމާދާ އެކީ ބީސީސީގެ އިސްވެރިން ބޭއްވި ބައްދަލުވުމުގައި މަޝްވަރާކުރި ކަންތައްތަކުގެ ތެރޭގައި، ދިވެހި އުފެއްދުންތަކަށް ޚާއްޞަ އޮތެންޓިކް މޯލްޑިވްސްގެ ފިހާރައެއް ލަންކާގައި ހުޅުވުމާއި، ދެ ގައުމުގައި ވިޔަފާރިތަކަށް ހުރި ފުރުޞަތުތަކާއި ލަންކާގައި ބާއްވާ ޓްރޭޑް ފެއާތަކުގައި ބައިވެރިވުމުގެ ފުރުޞަތު ދިވެހި ކުދި ވިޔަފާރިތަކަށް ހޯދައި ދިނުން ހިމެނެ އެވެ.
މީގެ އިތުރުން ކުދި ވިޔަފާރިތަކަށް ފަހި ފުރުޞަތުތައް ހޯދައި ދިނުމަށްޓަކައި އެކްސްޕޯ ނުވަތަ ޓްރޭޑް ފެއާ ލަންކާގައި ބޭއްވުމާއި ކަލްޗަރަލް އެކްސްޗޭންޖް ޕްރޮގްރާމެއް ފަށައި، އެކި ދާއިރާތަކުން ވިޔަފާރިތަކަށް ބޭނުންވާ އެހީތެރިކަން ހޯދުމާ ގުޅޭ ގޮތުން ވެސް މަޝްވަރާކޮށްފައިވެ އެވެ.