ބޯކޮށް ވާރޭ ވެހޭނެ ކަމަށް ލަފާކޮށް ރާއްޖޭ އެންމެ އުތުރަށް މިއަދު ނެރުނު ޔެލޯ އެލާޓް މިހާރު މުޅި ރާއްޖެ އަށް ދަންމާލައިފި އެވެ.
މޫސުމާ ބެހޭ އިދާރާ އިން އެ އެލާޓް ނެރެފައި ވަނީ މެންދުރު ފަހު 2:30 އާ ހަމައަށެވެ. އެގޮތުން އެ ވަގުތުގެ ތެރޭގައި ބޯކޮށް ވާރޭ ވެހި، ގަޑިއަކު 25-30 މޭލަށް ވައި ޖެހި، ވިލާގަނޑުގައި ގަޑިއަކު 50 މޭލަށް ވައި ގަދަވެ، ކަނޑު ވެސް ގަދަވާނެ ކަމަށް ލަފާކޮށްފައިވެ އެވެ.
މިދިޔަ މަހުން ފެށިގެން ރާއްޖެ އަށް މޫސުން ގޯސްވެފައިވާ އިރު، މި ފަހުން ބޯކޮށް ބައެެއް ރަށްރަށް ވާރޭ ވެހި ފެންބޮޑުވެ، ގެއްލުންވުމުގެ އިތުރަށް، ވައި ގަދަވަގެން ވެސް ތަފާތު ހާދިސާތައް ބައެއް ރަށްރަށުގައި ހިނގާފައިވެ އެވެ.
އެހެންވެ މި ދުވަސްވަރު މޫސުމަށް ސަމާލުވެ، ރައްކާތެރިކަމުގެ ފިޔަވަޅުތައް އެޅުމަށް ކަމާބެހޭ އިދާރާތަކުން އަންނަނީ އިލްތިމާސްކޮށް، އިރުޝާދު ވެސް ދެމުންނެވެ.