ސައިފް އަލީ ޚާންގެ އާ އެކްޝަން ތުރިލާ "ޖުވެލް ތީފް: ދަ ރެޑް ސަން ޗެޕްޓާ" ގެ ޝޫޓިން މިހާރު ހަންގޭރީގައި ކުރިއަށްދާކަން އިއުލާންކޮށްފި އެވެ.
އެ ފިލްމު ޕްރޮޑިއުސްކުރާ މާފްލިކްސް ޕިކްޗާސްގެ ވެރިޔާ ޑައިރެކްޓަރު/ޕްރޮޑިއުސަރު ސިދާތު އާނަންދު އިންސްޓަގްރާމް ޕޯސްޓެއްގައި ސައިފާއި ޑައިރެކްޓަރު ރޮބީ ގަރެވާލް އެކީގައި ނަގާފައިވާ ފޮޓޯއަކާ އެކީ ބުނީ ޝޫޓިން ކުރިއަށް ދަނީ ބުޑަޕެސްޓްގައި ކަމަށެވެ.
"ޖުވެލް ތީފު" ގެ ކާސްޓްގައި ޖައިދީޕް އަހުލުވާތު ވެސް ހިމެނޭ އިރު، މި ފިލްމާ ބެހޭ މާ ބޮޑު ތަފުސީލެއް މިހާތަނަށް ހާމަކޮށްފައެއް ނުވެ އެވެ. މި ފިލްމަކީ ސިދާތު ޑައިރެކްޓްކޮށް މި އަހަރުގެ ޖެނުއަރީގައި ގެނެސްދިން މާފްލިކްސްގެ "ފައިޓާ" އަށް ފަހު، އެ ސްޓޫޑިއޯ އިން ހަދާ ދެވަނަ ފިލްމެވެ.
މިދިޔަ އަހަރު ޝާހްރުކް ޚާންގެ "ޕަތާން" ގެނެސްދިން ސިދާތު ޑައިރެކްޓްކުރި ދެ ފިލްމެއް ސައިފް ކުރިން ކުޅެފައިވެ އެވެ. އެއީ 2005 ގެ "ސަލާމް ނަމަސްތޭ" އާއި 2007 ގެ "ތަރަ ރަމް ޕަމް" އެވެ.
ނެޓްފްލިކްސްއާ ގުޅިގެން ހަދާ "ޖުވެލް ތީފް" ބެލުންތެރިންނަށް ގެނެސްދޭނެ އިރެއް އަދި އިއުލާންކޮށްފައި ނުވާ އިރު، ސައިފް ރޯލެއް ކުޅެފައިވާ "ދެވާރާ: ޕާޓް 1" މި އަހަރުގެ އޮކްޓޯބަރުގައި ރިލީޒްކުރާނެ އެވެ. އޭގެ ލީޑް ތަރިންނަކީ ތެލެގޫ އެކްޓަރު އެންޓީއާރް ޖޫނިއާ އާއި ޖާންވީ ކަޕޫރެވެ.