މީގެ އެތައް އަހަރެއް ކުރިން އެޓްލާންޓިކް ކަނޑަށް ފެތުނު "ޓައިޓޭނިކް" ބަލަން މިދިޔަ އަހަރު ބަޔަކު ސަބްމެރިންްއެއްގައި ކުރި އަގުބޮޑު ދަތުރުގައި އެ ގޮވައި، އެ އެންމެން މަރުވި ހާދިސާ އަށް ފަހު، އެމެރިކާގެ ސަބްމެރިން އުފައްދާ ކުންފުންޏަކުން އަނެއްކާ ވެސް ޓައިޓޭނިކް އޮތް ތަނަށް ދަތުރެއް ކުރަން ރާވައި އެކަމަށް ތައްޔާރުވަމުން ފަށައިފި އެވެ.
އެގޮތުން މަހުޖަނުން ކަމަށްވާ ލެރީ ކޮނާ އާއި ޕެޓްރިކް ލަހޭގެ ކުންފުނި، ޓްރިޓަން ސަބްމެރިން އިން މިހާރު އަންނަނީ އެ ދަތުރަށް ބޭނުން ކުރާނެ ސަބްރިން ބަނުމުގެ މަސައްކަތް ކުރަމުންނެވެ.
މިކަމާ ގުޅޭ ގޮތުން އެ ކުންފުނީގެ ތަރުޖަމާނު މީޑީއާތަކަށް އިއްޔެ ވިދާޅުވީ ދަތުރު ބާއްވާނެ އިރެއް ރަސްމީކޮށް އިއުލާން ކުރާނީ ސަބްމެރިން ބަނދެ ނިންމައި ކަމާބެހޭ ފަރާތްރަކުން އެއަށް ހޯދަން ޖެހޭ ހުރިހާ ހުއްދަތަކެއް ހޯދައި ނިމުމުން ކަމަށެވެ. އެހެންވެ ޓްރައިޓަން ސަބްމެރިންސް އިިން "ޓައިޓޭނިކް" އޮތް ތަނަށް ކުރަން ހަމަޖެހިފައިވާ ދަތުރަށް ވަކި ޓައިމްލައިނެއް ކަނޑައެއް ނާޅަ އެވެ.
"ޓައިޓޭނިކް" އެޓްލާންޓިކް ކަނޑުގެ އަޑިއަށް ފެތުނީ ވަނީ އޭޕްރިލް 15، 1912 ގަ އެވެ. އެއީ އެ ބޯޓް އަލަށް ކުރި ދަތުރުގެ ތެރޭގައި ބޮޑު ގަނޑުފެންގަނޑެއްވައި ޖެހި ބޯޓް މެދުން ބިންދައިގެން ދިޔަ ހާދިސާގަ އެވެ. އެ ހާދިސާގައި ބޯޓުން ދަތުރުކުރި 1،500 އެއްހާ ފަސިންޖަރުންނާއި ފަޅުވެރިން މަރުވި އެވެ.
އެޓްލާންޓިކްގެ ކަނޑުގެ 3،800 މީޓަރު އަޑީގައި އޮތް "ޓައިޓޭނިކް" ބަލަން ފަސް މީހުންނާ އެކީ މިދިޔަ އަހަރުގެ ޖޫން މަހުގެ ފަހުކޮޅު "އޯޝަންގޭޓް އެކްސްޕެޑިޝަން" ކިޔާ ކުންފުންޏަކުން އިންތިޒާމުކޮށްގެން ކުރި ދަތުތުގައި، ސަބްމެރިން ގޮވައި މަރުވި މީހުންގެ ތެރޭގައި ހިމެނެނީ އޯޝަންގޭޓްގެ ސީއީއޯ ސްޓޮކްޓަން ރަޝް، 61، އާއި އިނގިރޭސި ވިޔަފާވެރިއެއް ކަމަށްވާ ހާމިޝް ހާޑިން، 58، އާއި ފްރާންސްގެ ޑައިވަރެއް ކަމަށްވާ ޕޯލް-ހެންރީ ނާޖިއޮލެޓް، 77، އާއި ޕާކިސްތާން ދަރިކޮޅުގެ އިނގިރޭސި މަހުޖަނެއް ކަމަށްވާ ޝާހުޒާދާ ދާއޫދު، 48، އާއި އޭނަގެ ދަރިފުޅު ސުލައިމާން ދާއޫދު ،19، އެވެ.
"ޓައިޓޭނިކް" ބަލަން އެ މީހުން ދިޔައީ ބޮލަކަށް 250،000 ޑޮލަރު ދައްކައިގެންނެވެ.